ԵՐԵՎԱՆ, 26 սեպտեմբերի–Sputnik. «Déjà Vu» տերմինը ֆրանսերեն է և թարգմանաբար նշանակում է «արդեն տեսած», հայտնում է developmentofmentalhealth.com կայքը։

Երբ մեզ հետ դեժավյու է պատահում, թվում է, թե ողջ իրադարձությունը, անգամ ամենափոքր մանրուքը, տեղի է ունեցել անցյալում, թեև գիտենք, որ իրադարձությունը տեղի է ունենում հենց այդ պահին։

Այս ամենը հաճախ նյարդայնացնող է և ուղեկցվում է անիրականի զգացողությամբ։ Շատերը դեժավյու են զգում իրենց կյանքի որոշակի պահերին, իսկ շատերը նման զգացողություն են ունեցել բազմաթիվ անգամ։

Ըստ որոշ հետազոտության` էպիլեպսիայով տառապող մարդիկ հաճախ են  դեժավյու զգում` ի տարբերություն այն մարդկանց, ովքեր հիվանդ չեն։ Մեկ այլ հետազոտության համաձայն` նման իրավիճակում որևէ նոր բան հիշողություն է առաջացնում անցյալում տեղի ունեցած նման իրադարձության մասին, սակայն մեր ուղեղը չի կարողանում հիշել։

Դեժավյուն բավականին անսովոր և տարօրինակ երևույթ է։ Քեզ թվում է, թե նախկինում նույն բանը արել ես, բայց ինչ–որ պատճառով չես կարողանում հիշել, թե ինչ։ Զգացողությունը ոչ բացասական է, ոչ էլ դրական։

Դեժավյուն սովորաբար տեղի է ունենում 15–25 տարեկանում, չնայած այդ զգացողությունը կարող է առաջանալ բոլոր տարիքի մարդկանց  մոտ։

Հոգեվերլուծության հայր Զիգմունդ Ֆրեյդը պնդում էր, որ դեժավյուի դեպքում մարդն ինքնաբերաբար հիշում է անգիտակից վիճակում գրանցված յուրաքանչյուր ֆանտազիա։  Հոգեբան, այս հարցի առաջատար մասնագետ Հերման Սնոուի կարծիքով` դեժավյուն տեղի է ունենում այն ժամանակ, երբ ընթացիկ իրադարձությունը համընկնում է տեղի ունեցած իրադարձության մշուշոտ պատկերի հետ, կարծես դուք ինքներդ ձեզ համոզում եք, որ գիտեք մարդուն, որին տեսել եք անվտանգության պահպանման տեսախցիկով նկարահանված աղոտ պատկերի միջոցով։

Մեկ այլ հնարավոր տեսության համաձայն` ուղեղը շփոթում է իրականության մեջ տեղի ունեցած իրավիճակը երազում տեղի ունեցած նման իրավիճակի հետ։ Դեժավյուն կարող է բացատրվել նաև հիշողության մասնակի համընկնման գլոբալ մոդելներով։

Գոյություն ունեն շատ տարբեր տեսություններ, որոնք փորձում են բացատրել դեժավյուն, սակայն մինչև հիմա չկա որոշակի պատասխան այն հարցին, թե այդ տեսություններից որ մեկն է ստույգ։ Սա մի ոլորտ է, որը պահանջում է հետագա բացատրություններ և հետազոտություններ։

ԵՐԵՎԱՆ, 5 մարտի - Sputnik. ՀՀ վարչապետ Նիկոլ Փաշինյանի` արտահերթ ընտրությունների առաջարկը ԲՀԿ–ն չի քննարկել։ Տեղեկությունն այսօր ԱԺ–ում կայացած ճեպազրույցում հայտնեց «Բարգավաճ Հայաստան» խմբակցության պատգամավոր Իվետա Տոնոյանը։

«Քանի որ այսօր կուսակցության քաղխորհրդի նիստ նախատեսված չէ, հետևաբար Նիկոլ Փաշինյան– Գագիկ Ծառուկյան հանդիպում ևս նախատեսված չէ»,–ասաց Տոնոյանը` հավելելով, որ այդ որոշումը պետք է բացառապես քաղաքական խորհրդի ձևաչափում կայացվի։ Այսինքն` ի հայտ եկած նոր իրողությունների քննարկում լինի, քաղաքական ներկա իրավիճակի ուսումնասիրություն, վերլուծություն և ըստ այդմ`քաղաքական դիրքորոշում։

«Այս պահին մենք ձեռնպահ ենք մնում հարցի հետ կապված մեր անձնական դիրքորոշումը ներկայացնելուց, մինչ այն պահը, երբ քաղաքական խորհուրդը` Գագիկ Ծառուկյանի գլխավորությամբ, կքննարկի որոշումը»,– ասաց Տոնոյանը` պատասխանելով հարցին` հնարավո՞ր է, որ ԲՀԿ–ն հրաժարվի Վազգեն Մանուկյանի գլխավորությամբ ժամանակավոր  կառավարության ձևավորման` ընդդիմադիր շարժման առաջ քաշած դիրքորոշումից ու ընդունի խորհրդարանը ցրելու ու նոր ընտրություններ անցկացնելու Փաշինյանի առաջարկը։

«Բարգավաճ Հայաստան» խմբակցության պատգամավոր Միքայել Մելքումյանն էլ շեշտեց, որ արտահերթ ընտրությունների անցկացումը նաև իրենց օրակարգում է։ «Խնդիրը դրանց անցկացման ժամկետի ու ձևաչափի մեջ է։ Բայց որ ճգնաժամ կա, ու այն երկար չի կարող շարունակվել, միանշանակ է»,– ասաց նա։

Մելքումյանը նշեց, որ կառավարման համակարգը չի գործում ու իր հաշվարկով դրա հետևանքով Հայաստանի տնտեսությունն օրական 5-7 մլն դոլար գումար է կորցնում։ Եվ սա, նրա խոսքով, ամիսներ շարունակվել այլևս չի կարելի։

 Հիշեցնենք, որ մարտի 4-ին, կայացել է Մարուքյան–Փաշինյան հանդիպումը։ ԼՀԿ առաջնորդը հայտնել է, որ Հայաստանում ստեղծված ներքաղաքական իրավիճակից դուրս գալու ճանապարհը արտահերթ ընտրություններն են, որն անցկացնելու կամք ունի նաև վարչապետը։

«Բարգավաճ Հայաստանը» վարչապետ հետ հանդիպման չէր գնացել`հայտարարելով, որ նրանից հրավեր չի ստացել։