ԵՐԵՎԱՆ, 24 սեպտեմբերի– Sputnik. Facebook սոցիալական ցանցի աշխատանքը խափանվել էր, կայքը չէր աշխատում մոտ 20 րոպե։
Facebook–ի էջ մտնելիս հայտնվում էր «Կներեք, ինչ–որ բան այն չէ, մենք աշխատում ենք այդ ուղղությամբ և կփորձենք խնդիրը լուծել որքան հնարավոր է շուտ» գրառումը։
Տեղեկատվական անվտանգության փորձագետ Սամվել Մարտիրոսյանը Sputnik Արմենիա պորտալին ասաց, որ, ամենայն հավանականությամբ, խափանումը կրում էր գլոբալ բնույթ։
«Այն էջը, որի վրա կայքի մշակողները գրում են իրենց հաշվետվությունները, չի աշխատում, այդ պատճառով դժվար է եզրահանգում անել, քանի որ տեղեկատվություն չկա։ Կարող եմ միայն նշել, որ կայքը հասանելի չէր ողջ աշխարհում», – ասաց Մարտիրոսյանը։
Այս պահին օգտատերերն արդեն կարողանում են օգտվել կայքից, սակայն այն աշխատում է դանդաղ և խափանումներով։
Facebook–ն աշխարհի ամենահայտնի սոցիալական ցանցերից է։ Օգոստոսի վերջին սոցցանցի այցելուների թիվը հասել է մեկ միլիարդի։
Սոցցանցի վերջին տվյալներով` Հայաստանից Facebook–ի ակտիվ օգտատերերի թիվը կազմում է 850 հազար մարդ։ Միաժամանակ հայկական լսարանը մշտապես աճում է, հուլիսից սոցցանցը համալրվել է 20 հազար ակտիվ հայ օգտատերերով։
