Բալայան. Հալեպում վիրավորված հայերն արդեն դուրս են գրվել հիվանդանոցից

ԵՐԵՎԱՆ, 22 սեպտեմբերի– Sputnik. Հալեպում գնդակոծության հետևանքով վիրավորվել են չորս հայեր, սակայն նրանք արդեն դուրս են գրվել հիվանդանոցից, Sputnik Արմենիա պորտալին հայտնեց Հայաստանի ԱԳՆ մամուլի քարտուղար Տիգրան Բալայանը։

Ավելի վաղ ԶԼՄ–ները հայտնել էին, որ Հալեպի Նոր Գյուղ հայաբնակ թաղամասը հրթիռակոծելու հետևանքով վիրավորվել են չորս հայեր։ Սիրիայում հրատարակվող «Գանձասար» թերթը հրապարակել է վիրավոր հայերի անունները` Կարո Աշճյան, Եղիա Փիլավճյան, Ժակլին Ասեյան և Ներսես Թաթոյան։«Բոլորն արդեն դուրս են գրվել հիվանդանոցից, նրանք թեթև վնասվածքներ են ունեցել»,– ասաց Բալայանը։

Սիրիայում ներքին հակամարտությունը սկսվելուց առաջ ավելի քան 100 հազար հայ էր բնակվում, նրանց մեծ մասն ապրում էր Հալեպում և հյուսիս–արևելքում` էլ Հասակե նահանգում։ Դամասկոսում բնակվում էր շուրջ 7000 հայ։ Սիրիական ճգնաժամը սկսվելուց հետո արաբական հանրապետությունը լքել են տասնյակ հազարավոր հայեր։