ԵՐԵՎԱՆ, 10 սեպտեմբերի – Sputnik. Ւնչպե՞ս հաջող ամուսնանալ. բավականին նուրբ հարց է, և հենց դա է հուզում գեղեցիկ սեռի գրեթե բոլոր ներկայացուցիչներին։ Տասնամյա փոքրիկ օրիորդին գրավում է հարսանեկան գեղեցիկ արարողությունն ու հարսի ճերմակ զգեստը, որն աղջկան գրեթե արքայդուստր է դարձնում։ Դեռահաս աղջիկների երազներում սպիտակ ձիու վրա նստած արքայազնն է։ Իսկ ահա ավելի հասուն տարիքում ամուսնության հետ կապված մտքերը դառնում են իրական և սերտորեն կապվում են կայուն, համերաշխ և երջանիկ ընտանիք ունենալու հետ։ Եվ այսպես, ի՞նչ անել գտնելու համար հենց այն միակին, որի հետ կլինես անսահման երջանիկ երկար տարիներ։ Sputnik Արմենիա պորտալն այս թեմայով իր յոթ գործնական խորհուրդներն ունի։
Հաճախ ժպտացեք
Ժպիտը հաջողության գրավականն է։ Գրավիչ ժպիտը կարող է հաճելի դարձնել անգամ ոչ այնքան գեղեցիկ աղջկան։ Բացի այդ, ժպիտը ցույց է տալիս, որ ձեզ մոտ ամեն ինչ լավ է, իսկ կենսուրախ մարդիկ միշտ գրավում են հասարակության ուշադրությունը։
Ստեղծեք ոճային զգեստապահարան
Անգամ եթե դուք շատ գումար չեք վաստակում, դա չի նշանակում, որ ժամադրության պետք է գնաք ոչ նորաձև, հնաոճ զգեստով։ Ոճային և նորաձև հագուստ կարելի է գնել տոնավաճառներում, բացի այդ, հիմա բազմաթիվ խանութներ մեծ զեղչեր են հայտարարում։ Ի վերջո, ոճային զգեստներ կարելի է նաև կարել։ Այժմ նորաձև տեսք ունենալու շատ հնարավորություններ կան անգամ համեստ աշխատավարձի դեպքում։
Տղամարդկանց դուր չի գալիս վառ գույների դիմահարդարումն ու կեղծ ժպիտը։ Տղամարդիկ կնոջ մեջ ավելի շատ գնահատում են բնականությունը։ Պետք չէ կերպար հորինել։ Չէ՞ որ հարսանիքից հետո, երբ սկսվի համատեղ կյանքը, այլևս հնարավոր չի լինի տղամարդուն ներկայացնել այդ շինծու կերպարը։ Բնական գեղեցկությունից ավելի լավ բան գոյություն չունի։
Մի մոռացեք ձեր մասին
Եթե զգում եք, որ հանդիպել եք ձեր կյանքի երկրորդ կեսին, մի փորձեք ձեր ողջ առօրյան նվիրել նրան։ Ժամանակ թողեք ձեր սեփական զբաղմունքների և նախասիրությունների համար, զբաղվեք ընթերցանությամբ, շփվեք ընկերուհիների հետ, այցելեք մարզասրահ, լեզուների ուսումնասիրման դասընթացների։ Տղամարդիկ ավելի շատ գնահատում են այն կանանց, ովքեր ունեն իրենց սեփական նախասիրությունները։ Անգամ ամուսնանալուց հետո մի սահմանափակեք ձեր հետաքրքրությունների շրջանակը, քանի որ միայն ափսեներ լվանալով և տուն մաքրելով դուք շատ շուտ կսկսեք ձանձրացնել ձեր սիրելիին։
Փորձեք ավելի շատ բան իմանալ ձեր ընկերոջ նախասիրությունների մասին
Հաճախ կանանց կարող են անիմաստ թվալ տղամարդկանց որոշ հետաքրքրությունները, սակայն ավելի ուշադիր լինելու դեպքում հնարավոր է, որ դա ձեզ ևս կհետաքրքրի։ Եթե, օրինակ, ձեր ընտրյալը ֆուտբոլ է սիրում, ապա կարող եք միասին գնալ ֆուտբոլային խաղ դիտելու։ Կամ կարող եք նրան օգնել ավտոմեքենան վերանորոգելու հարցում։ Ընդհանուր հետաքրքրությունը միայն կամրապնդի ձեր հարաբերությունները։
Սովորեք համեղ ուտեստներ պատրաստել
Իհարկե, ռեստորանի ուտեստները շատ համեղ են, սակայն շատ կարևոր է սիրելիին «երես տալ» տանը` սեփական ձեռքով պատրաստված համեղ խորտիկներով. չէ՞ որ դեպի տղամարդու սիրտը տանող ճանապարհն անցնում է նրա ստամոքսով։
Հիշեք` տղամարդիկ ազատասեր էակներ են
Հիշեք, որ տղամարդիկ շատ են սիրում ազատություն։ Ոչ մի տղամարդ չի համաձայնի իր ողջ կյանքն անցկացնել այնպիսի կնոջ հետ, որը կյանքի ընթացքում ոստիկանի պես կփորձի վերահսկել նրա կյանքը։ Անհրաժեշտ է սովորել չխանդել նրան ամեն կնոջ նկատմամբ, պետք է անձնական «տարածություն» թողնել սիրելիի համար, այդ դեպքում ավելի գնահատված կլինեք նրա կողմից։
Եվ վերջում հիշեք, որ աշխարհում անհնարին բան չկա։ Կարևոր է ցանկանալ, լսել սեփական սրտին ու առաջ շարժվել։
