ԵՐԵՎԱՆ, 7 սեպտեմբերի — Sputnik. Եվրոպայի խորհրդի խորհրդարանական վեհաժողովի պատվիրակության այցը Բելառուս սկսվում է երկուշաբթի` սեպտեմբերի 7–ին, հաղորդում է Sputnik Բելառուսը։

ԵԽԽՎ ներկայացուցիչները Մինսկ են ժամանում նախագահական մրցավազքը գնահատելու համար։ Նրանց առաքելությունը կտևի մինչև սեպտեմբերի 10–ը։ Պետության ղեկավարի ընտրությունների օրը` հոկտեմբերի 11–ին, պատվիրակները կրկին կայցելեն երկիր։

Պատվիրակությունը բաղկացած է վեհաժողովի վեց անդամներից, կազմում ընդգրկված են Հայաստանի, Գերմանիայի, Շվեդիայի, Թուրքիայի և Իտալիայի պատգամավորները։

ԵԽԽՎ ներկայացուցիչները ծրագրում են սեպտեմբերի 8-9–ին հանդիպել Ազգային ժողովի երկու նախագահների, Բելառուսի արտաքին գործերի նախարար Վլադիմիր Մակեյի և Կենտրոնական ընտրական հանձնաժողովի նախագահ Լիդիա Երմոշինայի հետ։

Բացի այդ, պատվիրակները հանդիպումներ կանցկացնեն նախագահական մրցավազքի մասնակիցների և նրանց ներկայացուցիչների, ընդդիմության անդամների, Բելառուսի հեռուստառադիոընկերության ղեկավար Գենադի Դավիդկոյի, ԶԼՄ–ների ներկայացուցիչների, դիվանագետների և հանրապետության ոչ կառավարական կազմակերպությունների աշխատողների հետ։

Քվեարկության հիմնական օրը` հոկտեմբերի 11–ին, ընտրությունների ընթացքին կհետևի ԵԽԽՎ 11 անդամներից բաղկացած պատվիրակությունը։

ԵՐԵՎԱՆ, 3 մարտի - Sputnik. ՀՀ ԶՈւ գլխավոր շտաբի պետին պաշտոնից ազատելու միջնորդության վերաբերյալ Հանրապետության նախագահի՝ 02․03․2021թ․ որոշման մասին հայտարարության վերլուծություն

Նախագահը հայտարարել է Սահմանադրության 139-րդ հոդվածի 2-րդ մասի 2-րդ նախադասությամբ սահմանված իմպերատիվ երկու պահանջներից երկրորդի կատարման մտադրության՝ առանձին դիմումով Սահմանադրական դատարան դիմելու մասին, հիմքը՝ Սահմանադրության 169-րդ հոդվածի 1-ին մասի 4-րդ կետը։
Սահմանադրական դատարանի լիազորությունները սահմանված են Սահմանադրության 168-րդ հոդվածով, որով վերաբերելի կետն առաջինն է, օրենքի համապատասխանությունը որոշելը։ Սահմանադրության 168-րդ հոդվածով Նախագահի հրամանագրի նախագծի սահմանադրականության կամ ՀՀ ԶՈՒ ԳՇ պետին պաշտոնից ազատման հարց լուծելու իրավասություն Սահմանադրական դատարանը չունի, այսինքն՝ Նախագահը վերաբերելիի մասով կարող է դիմել Սահմանադրական դատարան բացառապես «Զինվորական ծառայության և զինծառայողի կարգավիճակի մասին» 2017թ. նոյեմբերի 15-ի ՀՀ օրենքի (այսուհետ՝ Օրենք)՝ որպես նախագծի իրավական հիմքի՝ Սահմանադրությանը համապատասխանելու հարցը որոշելու խնդրանքով և ոչ կոնկրետ օրենքի հոդվածի կամ մասի։
Սահմանադրական դատարան դիմելու ժամկետ Սահմանադրության 139-րդ հոդվածի 2-րդ մասի 2-րդ նախադասությամբ և վերաբերող մասով Սահմանադրությամբ ընդհանրապես սահմանված չէ։ Վերաբերող մասով ժամկետները սահմանված են Օրենքի 35․1-րդ հոդվածի
3-րդ մասով՝ հրամանագրի նախագծի վերադարձից հետո 8 օր (ազատման հիմք Օրենքի 40-րդ հոդվածի 3-րդ մասը հղում է նշանակման կարգին)։
Հայտարարությամբ Նախագահը գործել է և հայտնել է մտադրությունը գործելու Սահմանադրությանը բացառապես համապատասխան։
ՀՀ ԶՈՒ գլխավոր շտաբի պետ, գեներալ-գնդապետ Օնիկ Վիկտորի Գասպարյանը մինչև 8-օրյա ժամկետի լրանալը (Նախագահի կողմից Սահմանադրական դատարան դիմելուց հետո սկսում են գործել այլ ժամկետներ) շարունակում է իր ծառայությունը հայրենիքին և ժողովրդին, հանդիսանում է Զինված ուժերի բարձրագույն զինվորական հրամանատարը։