Пресс-конференция актера Жерара Депардье

Դեպարդիեն ուզում է ապրել Բելառուսում գյուղացիների հետ

471
(Թարմացված է 17:25 04.09.2015)
Ես ցանկանում եմ ապրել Բելառուսում գյուղացիների կողքին, քանի որ այնտեղ շատ գեղեցիկ է, իսկ նախագահը լավ մարդ է, ասել է Դեպարդիեն

ԵՐԵՎԱՆ, 4 սեպտեմբերի – Sputnik. Ֆրանսիացի դերասան Ժերար Դեպարդիեն Le Figaro ամսագրին տված հարցազրույցում ասել է, որ ցանկանում է վաճառել Ֆրանսիայի իր ողջ ունեցվածքը, քանի որ այլևս չի ցանկանում լինել այդ երկրի մի մասը, հայտնում է Lenta.ru–ն։

Ընդ որում, նա չի բացառում Բելառուս տեղափոխվելու հնարավորությունը։

«Ես ուզում եմ ապրել Բելառուսում գյուղացիների հետ, քանի որ այնտեղ շատ գեղեցիկ է, իսկ նախագահը (Ալեքսանդր Լուկաշենկոն) լավ մարդ է։ Ինձ, անկեղծ ասած,  դուր չեն գալիս Եվրոպայի միտումները, Եվրոպան ինքն էլ իրեն դուր չի գալիս։ Նրանք միգրանտների, ֆերմերների հետ կապված խնդիրներ ունեն, իսկ իշխանությունը ժողովրդին արհամարհանքով է վերաբերվում», – ասել է դերասանը։

Նա ավելացրել է, որ սիրում է ֆրանսերենը, սակայն, դժվար թե, նորից Ֆրանսիա վերադառնա։ Այժմ դերասանն ապրում է Իտալիայում։

«Ես շրջագայում եմ, և դա հիանալի է։ Ես ոչ մի տեղ երկար չեմ մնում», – նշել է Դեպարդիեն։

Դերասանը Բելառուսում է եղել ընթացիկ տարվա հուլիսին և հանդիպել է նախագահ Ալեքսանդր Լուկաշենկոյի հետ։ Դեպարդիեն նշել է, որ հետաքրքրվում է երկրի գյուղատնտեսությամբ։ Այցի ընթացքում նա շոգեբաղնիք է ընդունել և համտեսել է բելառուսական խոհանոցի ուտեստները։ Երկրի ղեկավարը դերասանին խոտ հնձել է սովորեցրել։

2013 թվականին Դեպարդիեն Ռուսաստանի քաղաքացիություն է ստացել այն բանից հետո, երբ իր դժգոհությունն է հայտնել ֆրանսիական կառավարությունից` հարուստներից շքեղության հարկ գանձելու առաջարկի համար։

Դերասանն ավելի քան 25 տարի զբաղվում է գինեգործությամբ։ Նա խաղողի բազմաթիվ այգիներ ունի Ֆրանսիայում (Անժու, Բուրգունդիա, Մեդոկ գինեգործության շրջաններում), Մարոկկոյում, Իսպանիայում, Արգենտինայում, Իտալիայում և Ալժիրում։ Նա մի քանի ռեստորան ու առանձնատներ ունի Ֆրանսիայում։

471