Չինական Տյանցզին քաղաքում նոր պայթյուն է որոտացել

ԵՐԵՎԱՆ, 17 օգոստոսի– Sputnik. Երկուշաբթի առավոտյան Չինաստանի Տյանցզին քաղաքում, որտեղ անցած չորեքշաբթի հզոր պայթյուններ էին գրանցվել, կրկին ոչ մեծ պայթյուն է գրանցվել։ Այս մասին հայտնում է CCTV հեռուստաալիքը։

«Երկուշաբթի առավոտյան վտանգավոր նյութերով լի պահեստում ոչ մեծ պայթյուն է գրանցվել»,– հայտնում է հեռուստաընկերությունը։ Պայթյունը գրանցվել է առավոտյան 07։00–ին, պայթյունին հաջորդել են հրդեհն ու ծուխը։

Չորեքշաբթի տեղական ժամանակով 23։30–ին Բինհայ շրջանում 30 վայրկյան տարբերությամբ երկու հզոր պայթյուն է գրանցվել Ruihai Logistics լոգիստիկ ընկերության պահեստում, որտեղ վտանգավոր նյութեր են պահվում։ Պայթյուններն այնքան ուժգին են եղել, որ դրանք արձանագրել է տեղի սեյսմոլոգիական ծառայությունը։ Պայթյունների հզորությունը տրոտիլային համարժեքով կազմել է 3 և 21 տոննա։ Զոհվել է 85 մարդ, 720–ին տեղափոխել են հիվանդանոց:

Հայաստանի նախագահը ցավակցություն է հայտնել` չինական Տյանցզինում տեղի ունեցած միջադեպի կապակցությամբ։

Ամենահզոր պայթյունից հետո դեպքի վայրում ժամանակ առ ժամանակ նոր պայթյուններ են գրանցվում։