Истринское водохранилище

Մոսկվայի մերձակայքում վթարի ենթարկված ինքնաթիռը վտանգավոր խուսավարումներ է կատարել

756
Ուղղաթիռի օդաչուն չէր կարող տեսնել ինքնաթիռը, ասել է Free Fly Team ակումբի հրահանգիչ Սերգեյ Պլեխանովը

ԵՐԵՎԱՆ, 10 օգոստոսի  – Sputnik. Մոսկվայի մերձակայքում ուղղաթիռին բախված Cessna հիդրոինքնաթիռի օդաչուն վտանգավոր խուսավարումներ է կատարել, «360 աստիճան» հեռուստաընկերությանն է պատմել Free Fly Team ակումբի հրահանգիչ Սերգեյ Պլեխանովը։ Նշենք, որ վթարը գրանցվել է ակումբի թռիչքային գոտում։

Cessna հիդրոինքնաթիռը և Robinson ուղղաթիռը շաբաթ երեկոյան բախվել են Մոսկվայի մարզի Ալեխնովոյից ոչ հեռու գտնվող Իստրինսկի ջրամբարի տարածքում։ Զոհվել է ութ մարդ, նրանց մարմինները դուրս են բերել ջրից, մեկ մարդու որոնումները դեռ շարունակվում են։

«Օրվա ընթացքում մենք նկատեցինք, որ մեր հրապարակի վրայով Cessna ինքնաթիռի բազայում մի քանի անգամ կարմիր գույնի հիդրոինքնաթիռ էր պտտվում։ Վտանգավոր հնարքներ էր կիրառում։ Երկու անգամ մենք այդ պատճառով դադարեցրել ենք թռիչքները։ Դրանից առաջ մենք այդ հիդրոինքնաթիռը չենք տեսել»,– պատմել է Պլեխանովը։

«Ես տեղեկացրի Մոսկվայի օդային շարժման կառավարման տարածքային կենտրոնին, որ մեր թռիչքային գոտում այսպիսի ինքնաթիռ կա, որը վտանգավոր խուսավարումներ է կատարում։ Կենտրոնը տեղեկությունն ընդունեց»,– շարունակել է նա։

«Այնուհետև ես որոշեցի նույնիսկ դադարեցնել թռիչքները, քանի որ օդում այդպիսի չկառավարվող օդանավը բավականին վտանգավոր է մյուս մասնակիցների համար… Այդ պահին ես տեսա բալագույն ուղղաթիռ։ Շատ լավ ճանաչում եմ այդ ուղղաթիռը, քանի որ այն մեր հարևանն է նույն տարածքում… Ուղղաթիռը թռիչքի էր պատրաստվում… Թռիչքից անմիջապես հետո, հնարավոր է` 15 վայրկյան անց, դրա հետևում մի փոքր վերև հայտնվեց նույն հիդրոինքնաթիռը, որը նույն ուղղությամբ էր թռչում»,– պատմել է հրահանգիչը։

Ըստ նրա, «հիդրոինքնաթիռն իջնում էր, բայց ուղղաթիռի մակարդակից բարձր էր և գտնվում էր հետնամասում։ Համապատասխանաբար, ուղղաթիռի օդաչուն որևէ կերպ չէր կարող տեսնել ինքնաթիռը։ Հետո նրանք բախվեցին` հիդրոինքնաթիռը հարվածեց ուղղաթիռի վերին հատվածին, այսինքն` շարժիչին։ Դրանցի հետո երկու օդանավերն օդում մասնատվեցին, և բեկորները թափվեցին ներքև», – կատարվածը բնութագրում է Պլեխանովը։

«Դատելով ձայնից` ինքնաթիռը խափանումներ չի ունեցել։ Այսինքն, դա ուղղաթիռին հավասարվելու, իջնելու դիտավորյալ կատարած խուսավարում էր։ Եվ, հավանաբար, այնուհետև օդաչուն չհաշվարկեց հեռավորությունը, ինչն էլ հանգեցրեց նման հետևանքների»,– ասել է նա։

756