Շտապօգնության աշխատակիցները պարում են կորոնավիրուսից բուժվածների համար
(Թարմացված է 15:31 25.03.2020)
Հայ բուժաշխատողների պարը ինչպես ուրախացրել, այնպես էլ հուզել է մարդկանց։ Օգտատերերը վստահ են, որ կորոնավիրուսը հաղթահարելուց հետո ազգովի «Քոչարի» ենք պարելու։Շտապօգնության աշխատակից Սերժ Ազատյանը Facebook-ի իր էջում զվարճալի տեսանյութ է հրապարակել, որում երևում Է, թե ինչպես են շտապօգնության աշխատակիցները պարում գեղջկական, սիրային երգի՝ «Լի-լիի» ներքո։
«Շտապ օգնության 4-րդ ենթակայանի մեր աշխատակիցները պարում էին և ունեին բարձր տրամադրություն, անգամ իրար ծափ էին տալիս։ Իհարկե ուրախանալու առիթ են ունեցել, քանզի նրանց տրամադրության լավ կամ վատ լինելը կախված է մարդկանց առողջական վիճակից։ Բժիշկներ ջան, արժանի եք հոտնկայս ծափահարությունների, նման պարելու և ուրախանալու առիթներ շատ ունենաք, քանի որ դուք եք մարդկանց բժշկողը»,- գրել է նա։
Ազատյանը հանրությանը կոչ է արել օգնել բժիշկներին և մնալ տանը, որպեսզի նրանք իրենց գործը պատվով հաղթահարեն և միանան իրենց սիրելիներին։ Տեսանյութը հուզել է նաև օգտատերերին։
«Ապրեն մեր բուժաշխատողները, գոնե մի փոքր ցրեն լարված իրավիճակը», «տա Աստված գա օրը, որ ազգովի «Քոչարի» պարենք», «հուզվեցի, հպարտացա, խոնարհվում եմ բոլորիդ առաջ»,- գրել են նրանք։
Արտաշատի խանութներից մեկում մանրը վերադարձնում են գոգաթիակով. տեսանյութ
Հայաստանում կորոնավիրուսով վարակվածների թիվն այսօր ժամը 10։00-ի դրությամբ 265 է, նրանցից 16-ն առողջացել է։
Հայաստանում մարտի 16–ից ապրիլի 14-ը արտակարգ դրություն է հայտարարվել, իսկ երեկվանից՝ ժամը 23։59-ից խստացվել են արտակարգ դրության սահմանափակումները․ մեկ շաբաթ ՀՀ քաղաքացիները տնից դուրս գալու համար պետք է հիմնավոր պատճառ ունենան և ներկայացնեն անձնագիր ու պարետատան սահմանած ձևաթուղթ՝ ձեռագիր կամ տպագիր լրացրած։ Սահմանափակումները խախտողները կենթարկվեն վարչական, իսկ տնից դուրս գալու հետևանքով մեկ ուրիշին վարակելու դեպքում՝ քրեական պատասխանատվության։
Կատակ-երգ՝ կորոնավիրուսի թեմայով. հայ աղջիկների կատարումը շատերն են հավանել
թեգերը:
