Հայաստան հասած կորոնավիրուսն արդեն հասցրել է փոխել հայաստանցիների կենցաղին բնորոշ որոշ սովորույթներ։ Օրինակ` մի խումբ տղամարդիկ որոշել են այսուհետ ձեռքի փոխարեն ոտքով հրաժեշտ տալ իրար` հետևելով ՀՀ առողջապահության նախարար Արսեն Թորոսյանի խորհրդին։
«Արսեն Թորոսյանի խորհուրդն ընդունված է, բայց ինչպես ասում են, ելք կա։ Քանի որ մի քանի օր գործի չենք, որոշեցինք ոտքով հաջող անել իրար»,– նշում են տեսանյութի հեղինակները։
Հիշեցնենք՝ Հայաստանում կորոնավիրուսով վարակվելու առաջին դեպքի մասին հայտնի դարձավ մարտի 1-ի վաղ առավոտյան. վարակվածը 29-ամյա մի տղամարդ է: Նա Իրանից Հայաստան է ժամանել փետրվարի 28-ին:
Նախարար Արսեն Թորոսյանը մարտի 1-ին հրավիրած ասուլիսում խորհուրդ տվեց, որ հիվանդ մարդկանց հետ շփումից խուսափելուց, դիմակ կրելուց, ձեռքերը հաճախակի լվանալուց բացի, մարդիկ նաև ժամանակավորապես դադարեցնեն համբուրվելով ու ձեռքով բարևելը։ «Օրերը կտաքանան, ավելի ջերմ կբարևենք միմյանց»,– ասաց նա։
Կորոնավիրուսով վարակված տղամարդու հետ շփում ունեցած 32 անձինք մեկուսացվել են Ծաղկաձորի «Գոլդեն փելես» հյուրանոցում, որտեղ կմնան 2 շաբաթ։
