ՀՀ վարչապետի պաշտոնակատար Նիկոլ Փաշինյանն այսօր խորհրդակցություն է հրավիրել, որի ընթացքում քննարկվել են ոռոգման ոլորտում առկա խնդիրների լուծման ուղիները: Նա իր բացման խոսքը հրապարակել է Facebook–ում։
«Մենք արդեն բավականին երկար տարիներ արձանագրում ենք աննախադեպ շոգի առկայությունը։ Նշանակում է` պիտի ընդունենք այն փաստը, որ սա արդեն ոչ թե մեկ տարվա կամ մեկ ամսվա ընթացքում տեղի ունեցող երևույթ է, այլ գլոբալ կլիմայական փոփոխություն։ Նշանակում է` այն պրոբլեմները, որ մենք ունենք, դրանք մեծ հավանականությամբ լինելու են շարունակական։ Այսինքն` մենք ոռոգման ջրի խնդիր ենք ունենալու, և դա գյուղատնտեսության ոլորտում մեզ համար նոր մարտահրավերներ է ձևակերպում»,– ասել է Փաշինյանը։
Նրա խոսքով` այսօր հավաքվել են, որպեսզի քննարկեն իրենց անելիքները ընթացիկ տարվա մարտահրավերները լուծելու համար։
«Բայց գլոբալ առումով պետք է արձանագրենք` կլիմայական այս փոփոխությունները մեզ հանգեցնում են եզրակացության, որ, եթե շատ չոր ձևակերպենք, ավանդական ոռոգումը որպես այդպիսին ապագա չունի։ Մեր գլոբալ ռազմավարությունը պետք է լինի կաթիլային ոռոգման և նոր տեխնոլոգիաների կիրառումը։ Առաջիկայում պետք է խթանենք կաթիլային ոռոգման ներդրումը և այն, ինչ խոստացել ենք նախընտրական շրջանում, պետք է այդ ծրագիրը շատ արագ ներդնենք։ Հապաղելու և հետաձգելու ժամանակ չկա։ Մենք արձանագրել ենք նաև ջրամբարների կառուցման ու ջրի ծավալների ամբարման մեծացման անհրաժեշտությունը, ինչը նույնպես պետք է շատ արագ սկսենք»,– շեշտել է վարչապետի պաշտոնակատարը։
Նրա խոսքով` մեկ տասնյակից ավելի ջրամբարների շինարարությունն անհետաձգելի գործընթաց է, բայց նախևառաջ պետք է հասկանալ, թե ինչ քայլեր է պետք անել այս և հաջորդ տարվա համար։
«Մեր սիրելի վարչապետն եկավ, ասաց` ջրային խնդիր չի լինի, գնաց, ջուրը վաբշե կտրին». գյուղացի
«Որովհետև ինչքան էլ լավ աշխատենք, ցավոք, հնարավոր չի լինի մեկ–երկու տարում փոխել ոռոգման ամբողջ համակարգը։ ՀՀ օրենսդրությամբ որոշակի ընթացակարգեր են նախատեսված, մենք պետք է հասկանանք` ինչպիսի որոշումներ պիտի կայացնենք, ինչպես իրագործենք այդ որոշումները, որպեսզի կարողանանք ոռոգման ջրով ապահովել մեր գյուղացիական տնտեսություններին և որպեսզի մեր գյուղատնտեսությունը, որը բավականին լավ մեկնարկ է ունեցել տարեսկզբին, մեծ պրոբլեմների առաջ չկանգնի, կամ այդ պրոբլեմները լինեն կառավարելի»,– եզրափակել է Փաշինյանը։
Նշենք, որ 2021 թվականի հունիսն ուղեկցվում է աննախադեպ շոգերով, բարձր ջերմաստիճանով, ինչն իր հերթին ջրօգտագործման և ոռոգման ջրի խնդիրներ է առաջացնում Հայաստանում։
