Այսօր Էջմիածնի զորամասից Արցախ մեկնած 60 հոգանոց խմբից 34 անհայտ կորած զինծառայողների հարազատները կրկին հավաքվել էին Էջմիածնի զինվորական մասի մոտ։
Որոշ ժամանակ անց նրանք հրավիրվեցին ներս` խոսելու ԶՈւ գլխավոր շտաբի լրատվականի պետ Սամվել Ասատրյանի հետ։ Դուրս գալուց հետո հարազատները հայտնեցին լրագրողներին, որ գոհ չեն հանդիպումից։
«Ոչ մի բան էլ չպարզվեց, ժողովուրդ ջան, ասեցին` ընթացքի մեջ ա։ Երկու օր ա նույնն են ասում, փորձում են մեզ լռեցնել։ Չեն կարում ասեն երբեք, էսօր–վաղն են ասում։ Իրանք խաբում ենք, իրանց վրա հույս չկա, մեր միակ հույսը աստվածն ա», – ասաց կորած զինծառայողների հարազատներից մեկը։
Մյուսը հավելեց, որ իրենց խոստացել են հանդիպում կազմակերպել ԳՇ պետ Օնիկ Գասպարյանի հետ։
«Էդ էլ արդյունք չտա, բոլոր պետական ճանապարհները կփակենք մինչև մեր երեխեքից լուր չասեն։ Մտածում են` խելոք ժողովուրդ ա, կխաբեն, կհանգստացնեն, կգնա։ Չէ, տենց չի լինելու», – ասաց նա։
Նախապես ասվել էր, որ Ասատրյանի և զինծառայողների հարազատների հանդիպումը փակ է լինելու, քանի որ խոսակցության ընթացքում այնպիսի տեղեկատվություն է փոխանակվելու, որը ցանկալի չէ հրապարակվի։
Հիշեցնենք` Էջմիածնի զորամասից Արցախի Կովսական (Զանգելան) մեկնած 60 հոգանոց խմբից 34 զինվոր անհայտ կորել են։ Հարազատներին ՊՆ–ից հայտնել են, որ զինծառայողներին ուղեկցող է կցված եղել, որը պետք է նրանց անվտանգության գոտի տեղափոխեր, սակայն մառախուղի պատճառով ուղեկցողը շփոթվել և այլ տեղ է տարել խմբին։
Զինծառայողների հետ վերջին կապը եղել է հոկտեմբերի 20-ին։
