Տասնյակ հազարավոր հայեր այս պահին մեծ ակցիա են իրականցնում Բելգիայի մայրաքաղաք Բրյուսելում` Եվրոխորհրդարանի շենքի առջև։ Ակցիայի մանրամասները Sputnik Արմենիային ներկայացրել է Բելգիայի հայերի կոմիտեի մամուլի հաղորդակցության պատասխանատու Շահնուր Մինասյանը։
«Ես քեզ հաղթանակ կնվիրեմ». Արցախում վիրավորված զինվորը չի խաբում հարսնացուին
«Այսօր Եվրոխորհրդարանում պետք է քննարկվեր Արցախի հարցը, ինչի նպատակով էլ մենք հավաքվեցինք այստեղ։ Ցույցին մասնակցում են Բելգիայի հայերի կոմիտեն, Բելգիայում այլ հայկական կազմակերպություններ, ինչպես նաև հայկական կազմակերպություններ Ֆրանսիայից, Գերմանիայից, Հոլանդիայից», – ասաց Մինասյանը։
Եվրոխորհրդարանում Արցախի հարցով որևէ կոչ կամ բանաձև չընդունվեց, եղան միայն լսումներ։ 55 պատգամավոր իրենց խոսքում աջակցություն հայտնեցին Արցախին և հայ ժողովրդին։
Մինասյանը հավելեց, որ ամբողջ ընթացքում և մինչ այս պահը հայերը կաթվածահար են արել Բրյուսելի կենտրոնը` փակելով կենտրոնական հրապարակին հարող բոլոր փողոցները և հիմնական թունելը։
«Դեռ այստեղ ենք, դեռ կանգնած ենք, գուցե հետո ոստիկանությունը լրացուցիչ ուժեր կկենտրոնացնի, բայց դեռ նման բան չկա», – ասաց Մինասյանը։
Ակցիայի մասնակիցները վանկարկումներով շեշտում են, որ Էրդողանն ահաբեկիչ է, Ադրբեջանն՝ ագրեսոր, պարզած պահում են «Ճանաչեք Արցախի անկախությունը», «Կանգնեցրեք Էրդողանին», «Կանգնեցրեք Ալիևին», «Արցախը Հայաստան է» գրություններով պաստառներ:
Հիշեցնենք` սեպտեմբերի 27-ի վաղ առավոտյան Ադրբեջանը լայնածավալ ռազմական հարձակում է սկսել արցախա–ադրբեջանական սահմանի ողջ երկայնքով։
Հոկտեմբերի 6-ի ժամը 09։00-ի դրությամբ` հակառակորդի կրակոցների հետևանքով զոհվել են 284 զինծառայողներ և 19 քաղաքացիական անձինք։ Հայկական կողմը շուրջ 200 վիրավոր ունի։ Ադրբեջանի կենդանի ուժի վերաբերյալ պաշտոնական տեղեկություններ չկան, սակայն հայկական կողմը հայտնում է, որ հակառակորդը 3754 զոհ ունի, ավելի քան 5000 վիրավոր։
Ըստ վերջին տվյալների՝ Ադրբեջանի զինված ուժերը կորցրել են 17 ինքնաթիռ, 18 ուղղաթիռ, 128 անօդաչու սարք, 3 ՏՈՍ-1 «Սոլնցեպեկ», 4 «Սմերչ» համազարկային կրակի ռեակտիվ համակարգ, 416 տանկ և ՀՄՄ:
Առաջնագծում գտնվող տղաներն անում են անհնարինը. տեսանյութ
Սեպտեմբերի 29–ին և հոկտեմբերի 1–ին ադրբեջանական զինուժը կրակ է բացել նաև Հայաստանի ուղղությամբ։ Մասնավորապես թիրախավորվել են Վարդենիսն ու Մեծ Մասրիկը։
Հայացք թաքստոցից․ մահվան աչքերին նայած արցախցիները․ լուսանկարներ
