ՀՀ բնապահպանության և ընդերքի տեսչական մարմնի Արագածոտնի տարածքային բաժնի աշխատակիցները ոստիկանների հետ համատեղ փորձում են գորշ արջի անկման հանգամանքները պարզել դեպքի վայրում։ Տեղեկությունը հայտնում է ՀՀ բնապահպանության և ընդերքի տեսչական մարմնի մամուլի ծառայությունը։
«Գորշ արջի ձագը արտաքին վնասվածքներ չունի։ Համալիր ձեռնարկած աշխատանքի ընթացքում կբացահայտվեն դեպքի բոլոր մանրամասները»,– ասվում է տեսանյութում։
Հիշեցնենք` այսօր ԱԺ նախկին պատգամավոր Լյովա Խաչատրյանը գորշ արջի սպանված ձագի վերաբերյալ տեսանյութ էր հրապարակել ֆեյսբուքյան իր էջում։
ՀՀ շրջակա միջավայրի նախարար Ռոմանոս Պետրոսյանը հրատապ արձագանքել էր կատարվածին։ Նրա խոսնակ Դավիթ Գրիգորյանը հայտնել էր, որ նախարարի հանձնարարականով համապատասխան գրություններ կուղարկվեն ՀՀ ոստիկանություն և Բնապահպանության և ընդերքի տեսչական մարմին՝ գորշ արջի սպանված ձագի վերաբերյալ դեպքը մանրամասն ուսումնասիրելու և հանգամանքները պարզելու համար։
Հիշեցնենք`Հայաստանի Հանրապետության կենդանիների Կարմիր գրքում գրանցված գորշ արջ սպանելու համար ՀՀ քրեական օրենսգրքով նախատեսված է տուգանք՝ նվազագույն աշխատավարձի 400-600-ապատիկի չափով, կամ կալանք՝ 2-3 ամիս ժամկետով՝ 1-ից 5 միլիոն դրամ վնասի վերականգնմամբ։
