«Կինոկենտրոնը նման էր մութ թունելի, իրականացվում էին անհասկանալի նախագծեր». Շահբազյան

71
(Թարմացված է 23:15 13.02.2020)
Կինոռեժիսոր Արամ Շահբազյանը Sputnik Արմենիայի «Հակահարված» հաղորդման ընթացքում խոսել է կինոասպարեզում առկա իրավիճակի, աշխատանքային պայմանների և «Կինոյի մասին» օրենքի մասին։

Արամ Շահբազյանը շեշտում է, որ «թավշյա հեղափոխությունից» մի փոքր առաջ կնիոաշխարհում և կինոարտադրության բնագավառում սկսվել էր կինոհեղափոխությունը, որովհետև ոլորտի մասնագետները հասկանում էին, որ հին մեթոդներով այլևս անհնար էր իրականացնել կինոարտադրությունը։

«Տարբեր առաջարկներ էին հնչում «Կինոյի մասին» օրենքի կապակցությամբ, և սայլը սկսել էր տեղից շարժվել։ «Թավշա հեղափոխությունից» հետո շարժն արագացավ։ Կինոկենտրոնը նախկինում նման էր մի մութ թունելի, որտեղ իրականացվում էին անհասկանալի նախագծեր, և հայտնի չէր, թե ովքեր էին ներգրավվում արտադրության գործընթացում կամ ինչպես էին նախագծերն իրականացվում։ Իսկ երիտասարդներից ոմանք առհասարակ խաչ էին քաշել Կինոկենտրոնի վրա և գտնում էին, որ անհույս է այնտեղ գնալը»,– նշում է կինոռեժիսորը։

Արամ Շահբազյանի համոզմամբ` քանի դեռ «Կինոյի մասին» օրենքը չի ընդունվել և չի ձևավորվել դրանից բխող համակարգը, լիարժեք առաջընթաց չի լինի։ Այս պահին կա «Կինոյի մասին» օրենքի երեք տարբերակ, և այդ հանգամանքի վրա պետությունը լուրջ ուշադրություն է դարձնում, որովհետև դրանից են բխելու հետագա կանոնակարգերն ու խաղի կանոնները։ Պարզապես, ըստ Շահբազյանի, պետք է ընտրվի ոսկե միջինը։

Արամ Շահբազյանի փոխանցմամբ` կինոմատոգրաֆիստները հիմա գնում են անկախ կինոարտադրողի ճանապարհով։ Ընդ որում` ամեն ինչ արվում է, որպեսզի մեզ մոտ անկախ պրոդյուսերական ինստիտուտը գնալով զարգանա և խթանվի սեփական արտադրությունը։

71
թեգերը:
«Թավշյա հեղափոխություն», Կինոկենտրոն, ֆիլմ, Հայաստան, կինո
թեմա:
ՄԵՆՔ / Հակահարված (33)

sys_stories