Ինչո՞ւ էր պետք լուծարել Կրթության ազգային ինստիտուտը. Նունե Ամիրյան

1720
(Թարմացված է 16:52 02.10.2019)
ի՞նչ է նշանակում՝ մարդկանց հանել աշխատանքից, թե՝ գնացեք տուն, հետո կորոշենք, թե ինչ կառույց ենք սարքելու:

Հանրակրթության ոլորտի կարևոր օղակներից մեկը՝ Կրթության ազգային ինստիտուտը (ԿԱԻ), որը լուծում էր 38 հազարի հասնող ուսուցիչների վերապատրաստման խնդիրը, մշակում մեթոդաբանությունն ու իրականացնում մեթոդական աջակցություն, արդեն իսկ լուծարված է: Գործող կառավարության՝ այդ քայլի հիմնավորումն այն էր, որ այն չի կարող լինել ՓԲԸ, այսինքն՝ շահույթ հետապնդող կառույց:

Փոխարենը պետք է ձևավորվեր նույնպիսի գործառույթներ, բայց ԿԱԻ-ի համեմատ շատ ավելի համեստ կազմ ունեցող հիմնադրամ: Սակայն այդ «փոխարինող» մարմինն էլ տակավին չի ձևավորվել, ինչը, հասկանալի է, ԿԱԻ նախկին աշխատակիցների մոտ հարցերի տեղիք է տալիս:

Կրթության ազգային ինստիտուտի աշխատակիցները մոտ երեք ամիս առաջ արդեն հանդիպել են ԿԳՄՍ նախարար Արայիկ Հարությունյանի հետ, օրերս էլ, բողոքի ակցիայի շրջանակներում, զրուցել են նաև փոխնախարարի հետ, սակայն հարցերի իրական պատասխաններ չունեն:

Նման իրավիճակից մտահոգ ԿԱԻ նախկին աշխատակիցներից Նունե Ամիրյանը Sputnik Արմենիայի հետ զրույցում հենց այդ հարցերն է շեշտադրում:

«Ինչո՞ւ էր պետք լուծարել Կրթության ազգային ինստիտուտը, ինչո՞ւ էր պետք փոշիացնել այդ ուժը, չէ՞ որ այդտեղ իրականում հզոր գիտական, մանկավարժական խումբ էր ձևավորված, որը ուներ տարիների փորձ, ուսուցիդների հետ աշխատանքի մեծ փորձ: Այսինքն, ի՞նչ է նշանակում՝ բռնել ու այդ մարդկանց հանել աշխատանքից, թե՝ գնացեք տուն, հետո կորոշենք, որ կառույց ենք սարքելու, հետո՝ չենք հասկանում, թե ինչ կառույց ենք սարքելու», - տարակուսելով նշում է մեր զրուցակիցը:

Նունե Ամիրյանի կարծիքով` եթե նշվում է, թե ԿԱԻ աշխատակիցների քանակն ուռճացված էր, կարելի էր օպտիմալացում իրականացնել, կրճատել աշխատակազմը, հնարավոր էր նաև բարելավել ու ավելի արդյունավետ դարձնել կառույցի աշխատանքը: Մինչդեռ, տպավորություն է ստեղծվում, որ գլխացավը գլխատման միջոցով են փորձում «բուժել»:

Լավ, իսկ ի՞նչ է լինելու ԿԱԻ շուրջ 300 աշխատակիցների, առաջին հերթին՝ մասնագետ-մանկավարժների հետ, ի՞նչ են պատասխանել նախարարությունում նրանց: «Փոխնախարարը մեզ ասաց, որ լինելու է 50-80 հոգանոց կառույց: Բայց 50-80-ը թվային մեծ տարբերություն է: Ինձ անհասկանալի է դրա նշանակությունը: Եթե որոշվել էր, որ ՓԲԸ-ն պետք է հիմնադրամ դառնար, դրա համրա բավականաչափ մեծ ժամանակ կար՝ այս տարվա հունվարից: Գոնե այդ ժամանակ կարելի էր այդ գործն սկսել, հասկանալ, թե ինչ կառույց են սարքում, ի՞նչ գործառույթներով, ի՞նչ են փոխում, հետո փակել հին կառույցը, բացել նորն ու սկսել աշխատել:

«Արմավիրում թերացել են». նախարարը մատնացույց է արել ներառական կրթության խոչընդոտները

Նախարարի հետ հանդիպումից անցել է 3 ամիս, իսկ փոխնախարարն էլ մեզ ասաց, որ հոկտեմբերի կեսերին (կրթության) հիմնադրամի հետ կապված հարցը կմտնի կառավարություն: Ճիշտն ասած, երբ լսում ես այդ ժամանակահատվածի մասին, որ երկշաբաթյա ժամկետ է, իսկ դրանից հետո լսում ես այլ բան, որ ասում է, թե՝ իրենք դեռ չգիտեն՝ 50, թե՞ 80 հոգանոց կառույց կլինի, այսինքն՝ իրենց համար էլ դեռ պարզ չէ՝ ինչ կառույց են ուզում ձևավորել: Որոշակիություն չկա: Ի՞նչ է նշանակում՝ 50 կամ 80 հոգի»,-նշում է Նունե Ամիրյանը:

Թե ինչ այլ հարցեր են ծագել ԿԱԻ լուծարման հետ կապված, ինչ խնդիրների առաջ են կանգնել ավելի քան 38 հազար ուսուցիչները՝ Նունե Ամիրյանի հետ զրույցի տեսանյութում:

1720
թեգերը:
Նունե Ամիրյան, Ուսուցիչ, Կրթության ազգային ինստիտուտ (ԿԱԻ), Կրթության և գիտության նախարարություն (ԿԳՆ)
Ըստ թեմայի
Գժտության համազգեստ. հայ առևտրականները դժգոհ են կրթության նախարարի որոշումից
Ի՞նչ է արվել կրթության ոլորտում 6 ամսում. Sputnik–ի հյուրն է Արայիկ Հարությունյանը
Մարիա՛մ, դու կարող ես, կամ ինչպես աղջկան հաջողվեց մի քանի աշխատանք ունենալ առանց կրթության
Ի՞նչ խնդիրեր ենք լուծում ներառական կրթությամբ. 3 մարզում անցկացվել է հետազոտություն

sys_stories