Ռեկտորի թեկնածու Արմեն Հարությունյանը Sputnik Արմենիայի հետ զրույցում նշել է, թե կցանկանար, որ ավելի շատ թեկնածուներ մասնակցեին ընտրություններին և որ խորհուրդն այդ պաշտոնում ընտրեր «թատերականցու»։
«Ռեկտորի ընտրությունը անձերի պայքար չի կարող լինել, պայքարը պետք է լինի ծրագրային։ Պետք է լինի գաղափարների բախում։ Ես հանդես չեմ գալիս գործող ռեկտորի դեմ», - ասում է Հարությունյանը։
Հիշեցնենք, որ ԲՈՒՀ-ի ղեկավարի ընտրության մրցույթի հայտերը ներկայացնելու վերջնաժամկետը այսօր էր՝ մայիսի 10-ին: Ընտրությունը նախանշված է մայիսի 22-ին: Մինչև այս պահը հայտնի է երկու թեկնածուի մասին: Մեկը ԲՈւՀ-ի ռեկտորի ժամանակավոր պաշտոնակատար Լիլիթ Արզումանյանն է, մյուսը՝ Արվեստի պատմության, տեսության և կառավարման ֆակուլտետի դեկան Արմեն Հարությունյանը:
Թեկնածուների միջև հարաբերությունները լարված չեն․ Հարությունյանը նշում է, որ նույն ԲՈՒՀ-ում են աշխատում և չեն կարող վատ հարաբերություններ ունենալ։
Ռեկտորի թեկնածուն կարծում է, որ անձնական հարաբերությունները չի կարելի բերել աշխատանքային դաշտ։
ԲՈւՀ-ի ռեկտորին կընտրի խորհուրդը, որը վարչապետի որոշմամբ կազմված է 24 հոգուց և որի կազմում են ուսանողներ, ԲՈՒՀ-ի ներկայացուցիչներ և կառավարության նշանակած անդամները։
Sputnik Արմենիայի տաղավար հրավիրել էինք նաև մյուս թեկնածու՝ռեկտորի ժամանակավոր պաշտոնակատար Լիլիթ Արզումանյանին, բայց նա այս պահին նպատակահարմար չհամարեց մասնակցել մեր զրույցին։
Ամեն դեպքում, Sputnik Արմենիան պատրաստ է լսել նաև ռեկտորի թեկնածու տիկին Արզումանյանին։
