Ինչ է կատարվել Զարթոնքում. կրակոցների ու կռվի տեսանյութն արդեն համացանցում է

433
Տեսանյութում երևում է, թե ինչ է տեղի ունեցել Արմավիրի մարզի Զարթոնք գյուղում` գյուղապետի հրաժարականի պահանջով ակցիայից առաջ։

Արմավիրի մարզի Զարթոնք գյուղում այսօր առավոտյան տեղի ունեցած միջադեպի տեսանյութը տարածվել է սոցիալական կայքերում։ Տեսանյութում երևում է, որ գյուղացիները ցաքուցրիվ վազում են, հետո կրակոցներ են հնչում։

Հիշեցնենք` այսօր առավոտյան գյուղում ապրող մի խումբ անձինք հարձակվել էին Զարթոնքի դպրոցի հաշվապահի, ապա գյուղապետի` Պարույր Սարգսյանի տան վրա, ջարդուփշուր էին արել գյուղապետի սեփական և ծառայողական մեքենաները։

Հետո պարզ դարձավ, որ գյուղացիներից մեկը ծանր, ևս 5–ը միջին ծանրության վնասվածքներով տեղափոխվել են հիվանդանոց։

Գյուղի բնակիչների մի մասը փակել էին գյուղի սկզբնամասում գտնվող Երևան-Գյումրի երկաթգիծը և պահանջում էին գյուղապետ Պարույր Սարգսյանի հրաժարականը։

Դեպքից հետո գյուղացիների հետ հանդիպել էր Պետական վերահսկողական ծառայության պետ Դավիթ Սանասարյանը։ Նա հայտնել էր, որ գյուղապետի ղեկավարած տարիների փաստաթղթերում հայտնաբերված առերևույթ հանցագործության փաստերը երկուշաբթի կներկայացվեն դատախազությանը։ Գյուղապետ Պարույր Սարգսյանն էլ խոստացավ երկուշաբթի հանդես գալ հայտարարությամբ, ամենայն հավանականությամբ` հրաժարականի։

Քննչական կոմիտեն էլ հայտարարեց, որ դեպքի առթիվ հարուցվել է քրեական գործ, 2 անձ ձերբակալվել են, որոնցից մեկը գյուղապետի թոռն է։

Ըստ բողոքի ակցիա իրականացրած զարթոնքցիների` հենց նա է այսօր առավոտյան կրակել ու վիրավորել համագյուղացիներին:

433
թեմա:
Գյուղացիները պահանջում են Զարթոնքի գյուղապետի հրաժարականը (10)

sys_stories