«Խոսրովի անտառ» արգելոցում արդեն երրորդ օրն է, ինչ շարունակվում է հրդեհը։ Փրկարարները, հրշեջները, զինվորականները, բնապահպաններն ու հարակից համայնքների բնակիչներն արդեն 3 օր անտառում են ու պայքարում են բնությունը ոչնչացնող կրակի դեմ։
Արգելոցի «Զիմա» կոչվող տարածքից այսօր կրակն արդեն հասել է «Ալմալաղ» կոչվող տեղամաս։ Այնտեղ տանող լեռնային ճանապարհի աջ ու ձախ կողմերում տեսանելի էին արդեն հանգած կրակի մոխրից բռնկվող նոր օջախներ։ Այս հատվածներ փրկարարներն ու զինվորականները ստիպված են վերադառնալ` թույլ չտալու հրդեհի հետագա տարածումը։
Դեպի դեպքի վայր տանող ճանապարհը դժվարամատչելի էր։ Աջ ու ձախ կողմում տեսանելի են հրդեհի ցավալի հետևանքները։
«Ալմալաղ» տեղամասում մեր նկարահանման պահին փրկարարները պայքարում էին կրակի դեմ, որը չոր խոտի պատճառով արագորեն տարածվում էր։
Հրդեհաշիջման աշխատանքները ղեկավարող ՀՀ ԱԻՆ փրկարար ծառայության տնօրենի տեղակալ, գեներալ-մայոր Աստվածատուր Պետրոսյանը մեզ հետ զրույցում չցանկացավ խոսել մեղավորների մասին, բայց նշեց, որոշ հնարավոր պատճառներ։
«Դիտավորություն ես չեմ տեսնում։ Ե՛վ անզգուշությունը կարող է լինել, և՛ այս եղանակի պատճառով, և՛ ցանկացած այրվող նյութից, նույնիսկ` ծառի բներից կարող է կրակ ծագել»,– ասաց Աստվածատրյանը։
Հրդեհի բռնկման փաստով հարուցվել է քրեական գործ: Առկա հարցերի պատասխանները, թերևս կտա նախաքննությունը։
