Ֆրանսիական Կալե քաղաքում փախստականների ճամբարի բնակիչները լրագրողներին ցույց են տվել հայտնի փողոցային նկարիչ Բենքսիի աշխատանքները։ Վրանների մոտ գտնվող պատի վրա արված ստեղծագործությունները տեսնելու համար պարզապես պետք է 7 եվրո վճարել
Գրաֆիտին պատկերում է Սթիվ Ջոբսին` սիրիական փախստականի տեսքով, պայուսակը մեջքին ու Apple համակարգիչը ձեռքում։ Պատկերի կողքին գրված է. «Ոչ ոք արժանի չէ նման կյանքի»։
Ինչպես հայտնում է Ruptly գործակալությունը, Կալեի ճամբարում բնակվող փախստականներն առաջարկում են դիտել «սթրիթ արտի» ստեղծագործությունները` վճարելով 7 եվրո։
Կալեում ընդհանուր առմամբ 7 հազար փախստական կա, որոնց մեծ մասը եկել են Սիրիայից ու Աֆղանստանից` ցանկանալով հասնել Մեծ Բրիտանիա ու նոր կյանք սկսել այնտեղ։
Փախստականների հարցերով զբաղվող միջազգային կազմակերպության տվյալով` խաղաղ ու լավ կյանք գտնելու ակնկալիքով Եվրոպա է ժամանել 985312 փախստական։ Ամենամեծ թվով փախստականների է ընդունել Հունաստանը (800 հազար)։ Ընդ որում` Եվրոպա մեկնելու ճանապարհին մահացել է և անհետ կորել է շուրջ 3.7 հազար մարդ։
