Երևան, հրավառություն

Հայաստանն առաջ է անցել Վրաստանից. ինչո՞ւ է մեր երկիրը էժան ուղղությունների հնգյակում

219
(Թարմացված է 01:13 23.02.2019)
Մեր երկրի առանձնահատկությունն այն է, որ այստեղ յուրաքանչյուր մարդ կարող է գտնել հանգստի իր տարբերակը

ԵՐԵՎԱՆ, 23 փետրվարի — Sputnik, Լաուրա Սարգսյան. Հայաստանը եզակի երկիր է, որտեղ յուրաքանչյուր մարդ կարող է իր համար հանգստի հարմար տարբերակ գտնել։ Մեր երկրում կարելի է և՛ ճոխ հանգստանալ, և՛ համեստ։

Այս մասին Sputnik Արմենիայի հետ զրույցում ասաց Տուրիզմի հայկական ֆեդերացիայի նախագահ Մեխակ Ապրեսյանը։

Հայաստանն ի դեպ չորրորդ տեղն է զբաղեցրել աշխարհի ամենաէժան ուղղությունների շարքում Skyscanner հարթակի վարկածով։ Միաժամանակ այն առաջ  է անցել Վրաստանից, որը հինգերորդ տեղն է զբաղեցրել։

Հարթակի վարկածով` Հայաստանում երկուսով երկու շաբաթ հանգստանալը կարժենա հազար 512 դոլար։ Այդ գումարի մեջ մտնում է թռիչքը, բնակավայրը, սնունդը և այլ ծախսեր։

«Այս վարկանիշը կոտրել է այն կարծրատիպը, թե մեր երկրում ամեն ինչ թանկ է։ Նշեմ, որ էժանը չի նշանակում անորակ։ Այստեղ պետք է հասկանանք, որ մեր երկրի առանձնահատկությունն այն է, որ այստեղ յուրաքանչյուր մարդ կարող է գտնել հանգստի իր տարբերակը», – ասաց Ապրեսյանը։

1512 դոլարը նա իրական է համարում։ Մոտ 500 դոլարը կարժենան ինքնաթիռի տոմսերը (Ռուսաստանից), 200-ը` բնակարանը Երևանի կենտրոնում (խոսքը երկու շաբաթով բոլոր հարմարություններով բնակարանի վարձակալության մասին է. խմբ.), մնացած գումարը կգնա սննդի ու գնումների վրա։

Ապրեսյանի խոսքով` եթե չեք կարող ձեզ թույլ տալ Հայաստանում հանգստանալու համար մեծ գումարներ ծախսել, օրինակ` հինգաստղանի հյուրանոցի, սպա ծառայությունների, ինքնաթիռով ուղևորության ու օդապարիկով թռիչքի համար, ապա փոքր գումարով էլ կարող եք լավ ժամանակ անցկացնել։

Մայրաքաղաքում բազում հաճելի ու հետաքրքիր տեղեր կան, որոնք կարող են գրավել զբոսաշրջիկներին, իսկ թանգարաններում շրջելու համար առնվազն մի քանի օր կպահանջվի։ Իսկ մայրաքաղաքից դուրս կարող եք այցելել Էջմիածին, Խոր Վիրապ, Սևան, Գառնի, Գեղարդ, Արենի։

219
թեգերը:
Երևան, Հայաստան
Ըստ թեմայի
Դիլիջանը` իր բնությամբ և հուշարձաններով. նիրվանա պարգևող ֆոտոշարք
Դիլիջանի «կրեատիվ ափդեյթը». ինչպես են զբոսավարները զբոսաշրջիկներին Հայաստան բերում
Երևանի կենդանաբանական այգու էկզոտիկ բնակիչները. լուսանկարներ
Շուրջբոլորդ լեռներ են․ Հայաստանը Forbes-ի զբոսաշրջային ցուցակում է
Հինգ ճաշատեսակ, որոնք Հայաստանում զարմացնում են զբոսաշրջիկներին