ԵՐԵՎԱՆ, 6 օգոստոսի — Sputnik. Հայաստանի օդանավակայանների ուղևորահոսքը այս տարվա հունվար-հուլիս ամիսներին 11 տոկոսով գերազանցել է նախորդ տարվա նույն ժամանակահատվածի ցուցանիշը: Մեկնող և եկող ուղևորների ընդհանուր թիվը կազմել է 1 մլն 525 հազար 537 մարդ:
Քաղաքացիական ավիացիայի կոմիտեից տեղեկացնում են, որ այս տարվա միայն հուլիս ամսին երկու օդանավակայաններում ուղևորահոսքը կազմել է 318 հազար 585 մարդ՝ նախորդ տարվա նույն ամսվա ցուցանիշը գերազանցելով 13.8 տոկոսով:
Այսպես. հուլիսն «Զվարթնոց» օդանավակայանում ուղևորահոսքը կազմել է 300 հազար 687 մարդ՝ 11.1 տոկոսով գերազանցելով նախորդ տարվա հուլիս ամսվա ցուցանիշը:
2018 թվականի հունվար-հուլիս ամիսներին, 2017 թվականի նույն ամիսների հետ համեմատած, «Զվարթնոցում» գրանցվել է ուղևորահոսքի 7.7 տոկոս աճ: Նույն ժամանակահատվածում բեռնափոխադրումը կազմել է 9 հազար 478 տոննա:
Նախորդ տարվա նույն ամիսների ցուցանիշը կազմել է 12 հազար 708 տոննա ապրանք:
Այս տարվա հուլիսին Գյումրու «Շիրակ» օդանավակայանում ուղևորահոսքը կազմել է 17 հազար 898 մարդ: 2017 թվականի նույն ամսին ուղևորահոսքը կազմել է 9 հազար 98 մարդ:
«Շիրակում» 2018 թվականի հունվար-հուլիս ամիսներին ուղևորահոսքը կազմել է 93 հազար 986 մարդ, իսկ նախորդ տարի կազմել էր 44 հազար 271 մարդ:
Օդանավակայաններում 2018 թվականի հունվար-հուլիս ամիսներին, նախորդ տարվա նույն ամիսների հետ համեմատ, 11 տոկոսով աճել են նաև թռիչք- վայրէջքները: