ԵՐԵՎԱՆ, 9 դեկտեմբերի — Sputnik, Անի Լիպարիտյան. Դամբարանները, վանական խցերը, քարանձավներում գտնվող վանքերը, որոնք հենց ժայռի մեջ են փորված, և այնտեղ հազիվ է արևի ճառագայթ թափանցում, ինչպես նաև Հայաստանի կախարդական բնությունը ոգեշնչել են Մոսկվայից Հայաստան ժամանած ճանապարհորդ Եկատերինա Ֆոմիչևային: Իր տպավորությունների մասին աղջիկը պատմել է Sputnik Արմենիային:
Ամենից շատ նրան զարմացրել են հայկական լեռներն ու ժայռերը: Աղջիկը պատրաստ է կրկին Հայաստան գալ, այս անգամ Ծաղկաձոր այցելելու համար: Եկատերինան սահում է սնոուբորդով և մագլցել է սովորում Մոսկվայի ժայռամագլցման կենտրոններում:
«Ընդհանրապես, ես վաղուց եմ սնոուբորդով զբաղվում, տարբեր երկրներում եմ եղել, տարբեր բարձունքներ հաղթահարել: Քանի տարի է` ուզում եմ Ծաղկաձորը «ստուգել», բայց դեռ տեղ չեմ հասել: Պետք է այս տարվա վերջին արձակուրդս «ծախսեի»: Մոսկվայում ցուրտ էր, խոնավ, և ես որոշեցի ավելի տաք տեղ գտնել, որտեղ հասնելու համար շատ ժամանակ չի պահանջվի և նայելու բան կա: Հայաստանում հիանալի բնություն կա` դատելով լուսանկարներից և տեսահոլովակներից», — ասաց զբոսաշրջիկը:
Եկատերինան պատմեց, որ Հայաստան է եկել ընկերուհու հետ։ Նրանց հաջողվել է տեսնել Երևանը, Գառնին, Գեղարդը, Խոր Վիրապն ու Սևանը:
Ծաղկաձորից քիչ հեռու զիփլայնով թռիչք են կատարել, տեսել են Արարատն իր ողջ շքեղությամբ, Նորավանքը, հայտնի Տաթևի վանքը, Մուղնիի Սուրբ Գևորգ վանքը, Օհանավանքը, Սաղմոսավանքը: Աղջիկները բացահայտել են նաև Արա լեռը, Օշականի կիրճն ու Կարբին, այցելել են Օշականի եկեղեցին և Զվարթնոցի ավերակները:
«Մեզ լավ ուղեկցորդ բաժին հասավ: Նա երեք գիդ-վարորդներից միակն էր, որ շատ բան պատմեց երկրի, բնակչության և տեսարժան վայրերի մասին», — ասաց Եկատերինան:
Նա ուղեկցել է զբոսաշրջիկներին, ցույց տվել մոտակա տեսարժան վայրերը, «համեղ» սննդի կետերը, ուղևորության վերջին օրն էլ առաջարկել է օդանավակայան հասցնել:
Եկատերինան ու նրա ընկերուհին շոյվել են ուղեկցորդի ուշադիր ու հոգատար վերաբերմունքից: Հայկական խոհանոցը նույնպես դուր է եկել աղջիկներին` քաղցրավենիք, տոլմա, մատնաքաշ, խեցգետնի քաբաբ, որը համտեսել են Սևանում:
«Մեզ հետ տանում ենք խուրմա, դեղձ, մրգային լավաշ, կերամիկա, ինչպես նաև Վերնիսաժից գնած զարդեր: Ուղեբեռ չունեինք, միայն ձեռքի բեռ էինք վերցրել` առավելագույնը 10 կգ, այդ պատճառով մեզ հետ շատ բան տանել չենք կարող», — նշեց Եկատերինան:
Եկատերինան խոստանում է վերադառնալ: Նա մտադիր է Երևանում ջազ համերգի մասնակցել, այցելել Ծաղկաձոր և բացահայտել մեկ այլ` ծաղկած ու մայիսյան Հայաստանը:
