ԵՐԵՎԱՆ, 9 նոյեմբերի — Sputnik, Անի Լիպարիտյան. Երևանի ու Մոսկվայի միջև դժվար է զուգահեռներ անցկացնել, բայց այս քաղաքները հաստատ մի ընդհանրություն ունեն` երկուսում էլ հայեր շատ կան։ Այս մասին Sputnik Արմենիայի հետ հարցազրույցում ասաց մոսկվացի ճանապարհորդ Էլինա Վեսելովան։
Էլինան արձակուրդը որոշել է անցկացնել ընկերուհու հետ։ Սկզբում չեն կողմնորոշվել` ուր մեկնել` եվրոպական երկրնե՞ր, թե՞ Հայաստան։ Ի վերջո, կանգ են առել Հայաստանի վրա։
Հաղթել է տոմսերի մատչելի գինը, ինչպես նաև «էկզոտիկ» երկիր այցելելու ցանկությունը։
«Հայաստանում ընդամենը չորս օր ենք անցկացրել, բայց շատ բան ենք հասցրել տեսնել` Տաթև, Շաքիի ջրվեժ, Գառնի, Գեղարդ։ Զբոսնեցինք Երևանում, Մատենադարանում ու Ծիծեռնակաբերդում եղանք, գնացինք Խոր Վիրապ, Նորավանք, Ջերմուկ։ Հայկական գինի ու կոնյակ համտեսեցինք», — պատմեց Էլինան։
Լավաշի գաղտնիքը
Էլինան Հայաստանում բացահայտել է լավաշի «գաղտնիքը»։
«Ես իմացա, որ լավաշը կարելի է որպես ուտելի «անձեռոցիկ» օգտագործել։ Կարելի է ափսեն մաքրել լավաշով, հետո ուտել այն։ Այս մասին պատմեց ընկերուհուս բարեկամուհին։ Շատ հետաքրքիր ավանդույթ է», — պատմեց ճանապարհորդուհին։
Այդ կարճ ժամանակահատվածում աղջիկները չեն հասցրել ընկերանալ տեղացիների հետ, բայց հասցրել են վայելել հայաստանցիների հյուրընկալությունը։
«Հայերը բարի են ու շփվող, գրեթե յուրաքանչյուրը փորձում էր երկրի պատմությունը պատմել։ Բոլորը հարցնում էին` որտեղից ենք եկել, հավանում ենք Հայաստանը։ Շատ հաճելի մարդիկ են։ Ճիշտ է` տաքսու վարորդներից շատերը, տեսնելով, որ տեղացի չենք, փորձում էին ավելի շատ փող «պոկել», բայց մեզ այդ մասին արդեն զգուշացրել էին», — պատմեց աղջիկը։
Էլինայի խոսքով` ուղևորության ընթացքում բարդություններ չեն առաջացել, և ուրախ ու «համեղ» ժամանակ են անցկացրել։
«Այդ օրերի ընթացքում կերանք խաշլամա, քաբաբ, իշխան, խորոված, հայկական լավաշ, պանրի տեսակներ, մածուն, թարմ մրգեր։ Նաև քաղցր ու հյութալի սուջուխ», — պատմեց Էլինան։
Ոսկե աշուն
Հայաստանի ոսկե աշունը աղջիկներին նույնպես անտարբեր չի թողել։ Գույնզգույն ծառերը ժպիտ են պարգևել, ձյունածածկ սարերը` կախարդել նրանց։
«Հավանեցինք նաև հին վանքերի ու եկեղեցիների ճարտարապետությունը, այդ շինություններում հանգստություն ու խաղաղություն էր տիրում։ Տաթև հասանք ճոպանուղիով։ Շատ տպավորիչ էր։ Եկեղեցի մտանք։ Լռություն, հանգստություն։ Այնտեղ միայն դրական մտքեր են պտտվում գլխումդ», — ասաց Էլինան։
Էլինան ընկերուհու հետ ապրել է հայ բարեկամների մոտ, որոնք իրենց կատակներով մշտապես ջերմ ընտանեկան մթնոլորտ են ապահովել։
