ԵՐԵՎԱՆ, 15 նոյեմբերի – Sputnik. Հայաստանի ֆուտբոլի ազգային հավաքականը Հունաստանի դեմ խաղում հանդես կգա կարմիր մարզաշապիկով։ Այս մասին հայտնում է Հայաստանի ֆուտբոլի ֆեդերացիան։ ՀՖՖ–ն մարզաշապիկների լուսանկարը հրապարակել է Facebook–ում։
Հայաստան-Հունաստան հանդիպումը Վազգեն Սարգսյանի անվան «Հանրապետական» մարզադաշտում կմեկնարկի 21։00-ին։
Հենրիխ Մխիթարյանն ու Գևորգ Ղազարյանը չեն մասնակցելու այսօրվա հանդիպմանը, որն անցնելու է Աբրահամ Խաշմանյանի ղեկավարությամբ։
ՀՖՖ–ն ավելի վաղ հայտարարել էր, որ կուտակումներից խուսափելու համար ցանկալի է մարզադաշտ գալ խաղից երկու ժամ շուտ։ Իսկ հավաքականի ֆան շարժում FAF-ը ժամը 19։00–ից Օպերայի շենքի մոտից երթ կկատարի դեպի ստադիոն։
Հիշեցնենք` նոյեմբերի 7-ին Խաշմանյանը միաձայն ընտրվեց ազգային հավաքականի մարզիչ։ Մինչ այդ` հոկտեմբերի 18-ին, Արմեն Գյուլբուդաղյանցը հրաժարվել էր այդ պաշտոնից։
Նրա հրաժարականին նախորդել էր հոկտեմբերի 15-ին Ֆինլանդիայի ընտրանու հետ հանդիպումը, որն ավարտվել էր մեր հավաքականի 0:3 հաշվով պարտությամբ: Հայաստանի հավաքականը 10-րդ տուրի հանդիպումը կանցկացնի նոյեմբերի 18-ին` հյուրընկալվելով Իտալիայի հավաքականին: