Կարեն Գիլոյան

Երևանում բասկետբոլի Եվրասիական լիգա կանցկացվի. ովքե՞ր են բարձր պահելու Հայաստանի պատիվը

33
(Թարմացված է 16:50 30.09.2019)
Եվրասիական լիգայի նախագահ Կարեն Գիլոյանը վստահ է, որ այս աննախադեպ մրցաշարի մեկնարկով Հայաստանում նոր խթան կհաղորդեն բասկետբոլի զարգացմանը։

ԵՐԵՎԱՆ, 30 սեպտեմբերի — Sputnik. Հոկտեմբերի 1-ին Երևանում բասկետբոլի միջազգային մրցաշար կանցկացվի, որը կկոչվի Եվրասիական լիգա։ Այսօր Sputnik Արմենիա մամուլի կենտրոնում կազմակերպված ասուլիսի ժամանակ Եվրասիական լիգայի նախագահ Կարեն Գիլոյանը խոսեց մրցաշարին մասնակցող թիմերի ու մրցաշարի նպատակի մասին։

Մրցաշարին մասնակցելու է հինգ թիմ` Հայաստանից՝ «Ուրարտուն» և «Արագածը», Ռուսաստանից՝ Տուլայի «Արսենալը», Բելառուսից՝ «Բորիսֆենը», Ղազախստանից՝ «Բարսի Ատիրաու» թիմը: Վեցերորդ մասնակցի անունը հայտնի կդառնա մինչ մրցաշարի մեկնարկը:

«2018 թվականի փետրվարի 22-26-ը Երևանում ԵԱՏՄ գավաթ անունը կրող միջազգային մրցաշար անցկացնելուց հետո մենք հասկացանք, որ կարող ենք միջազգային բարձր կարգի մրցաշար կազմակերպել ու անցկացնել: Ճիշտ է` մեր մրցումներին մասնակցում են միջին բյուջե ունեցող թիմեր, բայց սա շատ լավ հնարավորություն է յուրաքանչյուր թիմի ու երկրի բասկետբոլիստների վարպետությունը զարգացնելու համար»- նշեց Գիլոյանը:

Եվրասիական գավաթի առաջին խաղարկությանը մասնակցող թիմերի քանակը հասկանալու համար տարբեր ձևաչափեր են քննարկվել: Հաշվի առնելով, որ վեցից շատ թիմերի մասնակցությունը կարող է առաջին մրցաշարի համար խնդիր առաջացնել, որոշվել է առայժմ բավարարվել վեց մասնակցով: Պատճառն այն է, որ մասնակից թիմերը հանդես են գալիս իրենց երկրների ներքին առաջնություններում, բացի այդ մասնակցում նախ միջազգային այլ մրցաշարերի, բայց ինչպես նշեց Գիլոյանը, նպատակ կա առաջիկա 4-5 տարիների ընթացքում մասնակիցների թիվը հասցնել 16-ի:

Եվրասիական գավաթի մրցաշարի մասնակիցներից յուրաքանչյուրը մրցակցի հետ երկու հանդիպում է անցկացնելու՝ սեփական և մրցակցի հարկի տակ: Լավագույն քառյակում հայտնված թիմերը 2020 թվականի մարտին կմասնակցեն քառյակի մրցաշարին: Կլինի կիսաեզրափակիչ երկու խաղ, հետո երրորդ տեղի ու չեմպիոնի կոչման համար խաղեր:

«Արագած» և «Ուրարտու» թիմերն ներկայացնող Դավիթ Ջոնթոյանն ու Արա Պողոսյանն էլ վստահեցրին, որ այս մրցումներում իրենք ներկայացնելու են ոչ միայն սեփական ակումբի, այլ Հայաստանի մարզական պատիվը, հետևաբար լուրջ են նախապատրաստվել Եվրասիական գավաթի խաղարկությանը:

Մրցաշարի բացման հանդիսավոր արարողությունը տեղի կունենա հոկտեմբերի 2-ին նախկին «Միկա» մարզադպրոցի մարզադահլիճում, որտեղ էլ կանցկացվեն բոլոր հանդիպումները: Իսկ առաջին խաղը կայանալու է հոկտեմբերի 1-ին: Այդ օրը կմրցեն «Բարսի Ատիրաու» և «Արագած» թիմերը:

33
թեգերը:
Կարեն Գիլոյան, բասկետբոլ, Հայաստան