ԵՐԵՎԱՆ, 15 հունիսի - Sputnik. Հայաստանի ֆուտբոլի ֆեդերացիան (ՀՖՖ) պարգևատրել է 2018-19թթ․ ֆուտբոլային մրցաշրջանի առաջատարներին: Այս մասին հայտնում է ՀՖՖ մամուլի ծառայությունը։
Երեկ կայացած մրցանակաբաշխության ժամանակ Հայաստանի չեմպիոն «Արարատ-Արմենիային» ոսկե մեդալներն ու գավաթը հանձնել է Հայաստանի ֆուտբոլի ֆեդերացիայի նախագահ Արթուր Վանեցյանը։
Պարգևատրվել են նաև փոխչեմպիոն «Փյունիկն» ու բրոնզե մեդալակիր «Բանանցը»։ «Ոսկե խաղակոշիկով» պարգևատրվել է «Լոռիի» հարձակվող, առաջնության ռմբարկու Ջոնել Դեսիրեն (17 գոլ)։ Առաջին խմբի չեմպիոն «Յունիոր Սևանին» շնորհվել է չեմպիոնական փոքր գավաթը։
Պարգևատրվել են նաև ֆուտզալի Հայաստանի չեմպիոն «Լեոն», րծաթե մեդալակիր «Արմենիա Թրավելը», բրոնզե մրցանակակիր «Կումայրին»։
Ֆուտզալի լավագույն խաղացողի անհատական մրցանակը բաժին է հասել «Լեոն» ներկայացնող Սարո Գալստյանին, լավագույն ռմբարկուի պարգևը՝ նրա թիմակից Գարեգին Մաշումյանին (42 գոլ)։
Հիշեցնենք` Երևանի «Արարատ-Արմենիան», մայիսի 30-ին Հայաստանի ֆուտբոլի բարձրագույն խմբի առաջնության վերջին տուրում, 1։0 հաշվով հաղթանակի հասնելով «Բանանցի» նկատմամբ, վաստակեց 61 միավոր ու հռչակվեց 28-րդ առաջնության չեմպիոն: