Հայաստանի հավաքականն անակնկալ մատուցեց Աթենքում. լուսանկարներ
Հայաստանի հավաքականն անակնկալ մատուցեց Աթենքում. լուսանկարներ
Sputnik Արմենիա
Եվրոպայի 2020 թվականի առաջնության ընտրական J խմբում Հայաստանի հավաքականը 3:2 հաշվով հաղթեց Հունաստանի ընտրանուն Աթենքում, ապացուցելով որ ոչինչ դեռ կորած չէ... 12.06.2019, Sputnik Արմենիա
Եվրոպայի 2020 թվականի առաջնության ընտրական J խմբում Հայաստանի հավաքականը 3:2 հաշվով հաղթեց Հունաստանի ընտրանուն Աթենքում, ապացուցելով որ ոչինչ դեռ կորած չէ ընտրական փուլում:
ԵՐԵՎԱՆ, 12 հունիս — Sputnik, Խաչիկ Չախոյան. Եվրո 2020-ի ընտրական՝ Հունաստան-Հայաստան հանդիպումը շատերի համար անակնկալ ավարտ ունեցավ: Ֆավորիտ համարվող հույները կրեցին երկրորդ անընդմեջ պարտությունը, իսկ Հայաստանի հավաքականը տոնեց երկրորդ անընդմեջ հաղթանակը ընտրական խմբում:
Ինչպես և Լիխտենշտեյնի հետ երեք օր առաջ կայացած խաղում, Հայաստանը հավաքականը արագ հասավ հաջողության: Տիգրան Բարսեղյանին փոխանցումից հետո Ալեքսանդր Կարապետյանը արագության տակ ներխուժեց մրցակցի տուգանային հրապարակ ու շրջանցելով դարպասապահին, սուր անկյանից կարողացավ գնդակն անցկացնել Հունաստանի հավաքականի դարպասից ներս:
Հայաստանի հավաքականի ֆուտբոլիստները տոնում են խփած առաջին գոլը
Բնականաբար խփած գնդակը վստահություն հաղորդեց մեր ընտրանու ֆուտբոլիստներին, իսկ 33-րդ րոպեին արդեն իր անհատական վարպետությամբ փայլեց Գևորգ Ղազարյանը: Կամո Հովհաննիսյանը ժամանակին տեսավ թիմակցին մրցակցի տուգանային հրապարակում, իսկ Ղազարյանը գեղեցիկ շրջանցելով հույն պաշտպանին, վարպետորեն գնդակը պտտեցրեց դեպի դարպասի հեռավոր անկյունը՝ 2:0:
Հայաստանի հավաքականի ֆուտբոլիստները՝ իրենց խփած երկրորդ գոլից հետո
Երկրորդ խաղակեսի սկզբում հույների խփած գնդակը լարեց հանդիպումը: Նվազագույն առավելությունը իհարկե մեր թիմի համար արդեն դժվար էր պահել, քանի որ հոգեբանորեն հույները առավելություն ստացան: Բայց Տիգրան Բարսեղյանի խփած գնդակը շատ ճիշտ ժամանակին էր: Հենրիխ Մխիթարյանը նետվեց առաջ ու տեսավ թիմակցին աջից, իսկ Բարսեղյանի հարվածից հետո գնդակը հետ մղվեց դարպասաձողից, ապա մեր հարձակվողը շատ հանգիստ այն ուղարկեց հույների դարպասը:
Լիխտենշտեյնի հավաքականի հետ խաղում մեր հավաքականին խոշոր հաշիվ ապահոված Գևորգ Ղազարյանը, Ալեքսանդր Կարապետյանը և Տիգրան Բարսեղյանը նորից կարողացան արդյունավետ գործել ու ապահովել մեր թիմի հաղթանակը: Չնայած այս խաղում կարող էին և չհաղթել, կամ հաղթել ավելի լավ հաշվով: Դրա մասին խոսում է հանդիպման վերջաբանը:
Հույների հետ նախորդ չորս խաղերում մեր հավաքականը կրել էր երեք պարտություն և մեկ հանդիպում էլ ավարտել ոչ-ոքի, ու ընդ որում ոչ մի անգամ չէր գրավել Հունաստանի հավաքականի դարպասը: Այս խաղում երեք անգամ հասանք հաջողության:
