Ըմբշամարտ

Թուրք և ադրբեջանցի ըմբիշների հետ գոտեմարտերում լարվածությունը մեծանում է. Արմեն Բաբալարյան

160
Հունահռոմեական ըմբշամարտի Եվրոպայի առաջնությունից հետո մեր հավաքականի մարզիչ Արմեն Բաբալարյանը հերթական անգամ փաստեց, որ ազգությամբ թուրք և ադրբեջանցի ըմբիշների հետ գոտեմարտերում լարվածությունը կտրուկ մեծանում է, ինչը երբեմն խանգարում է լավ գոտեմարտ անցկացնելուն:

ԵՐԵՎԱՆ, 13 մարտի — Sputnik, Խաչիկ Չախոյան. Սերբիայի Նովի Սադ քաղաքում ավարտված մինչև 23 տարեկան ըմբիշների այս առաջնության ընթացքում հայ հունահռոմեականները ադրբեջանցի ըմբիշների հետ չգոտեմարտեցին: Վիճակահանության արդյունքներով մերոնց մրցակից բաժին հասան այլ երկրների ներկայացուցիչներ, բայց թուրքերի հետ գոտեմարտեր եղան: Անընդունելի երևույթ գրանցվեց 63կգ քաշային կարգի մրցումներում, երբ մեր մարզիկ Սլավիկ Գալստյանը քառորդ եզրափակիչում 10:1 հաշվով առավելության հասավ թուրք Աբդուլահ Թոփրակի նկատմամբ: Թուրք մրցակիցը պարզապես հրաժարվեց ընդունված կարգի համաձայն  գոտեմարտից հետո սեղմել հայ ըմբիշի ձեռքը:

«Նման երևույթներ ոչ հաճախ, բայց լինում են: Կարելի է ասել, որ մենք պատրաստ ենք թուրք և ադրբեջանցի ըմբիշների նման պահվածքին, սակայն մեր ըմբիշները երբեք այդպես չեն վարվի, նույնիսկ եթե գոտեմարտում պարտվեն: Ըմբշամարտի մեծ ընտանիք է` տարբեր երկրների մարզիկներից բաղկացած, ու յուրաքանչյուրը ներկայացնում է իր երկրի ոչ միայն ըմբշամարտը, այլ նաև մշակույթը, կուլտուրան և դաստիարակությունը: Հաղթեցինք շատ լավ, չհաղթեցինք կանենք հետևություններ: Այսքան բան» -նշեց Արմեն Բաբալարյանը:

Մրցումների ընդհանուր արդյունքների մասին խոսելիս` հավաքական մարզիչը նշեց, որ շատ բարդ վիճակահանություն բաժին հասավ հայ ըմբիշներին: Բացի այդ, ոչ բոլորը կարողացան հոգեբանորեն հարթ անցնել մրցաշարը: Նորայր Հախոյանը ցավալի պարտություն կրեց ռուս մրցակցից: Հավասար միավորների պայմաններում, հաղթանակը ռուսին շնորհվեց, քանի որ մեր ըմբիշը զգուշացում ուներ: Արմեն Մելիքյանը հաղթում էր Ուկրաինան ներկյացնող մեր հայրենակից Ժորա Աբովյանին 7:0 հաշվով ու, փորձելով ժամանակից շուտ ավարտել գոտեմարտը, բաց թողեց մրցակցի գրոհն ու պարտվեց նորից հավասար միավորների դեպքում:

Սլավիկ Գալստյանն էլ, հասնելով եզրափակիչ,  մրցեց վրացի Լևանի Կավչարաձեի հետ, ոիրն աշխարհի առաջնությունում հաղթել էր 10:0 հաշվով: Այս անգամ էլ մեր ըմբիշը հաղթում էր առաջին մրցափուլից հետո 8:4 հաշվով, բայց երկրորդ մրցափուլում հոգնածություն զգացվեց ու պարտվեց 8:10:

Այսպիսով, այն որ մենք ունենք ըմբիշներ, որոնք ապագայում կարող են նոր էջեր կերտել հայկական ըմբշամարտում, կասկած չկա: Եվ նման կարգի մրցումներից հետո, բնականաբար, մտորելու առիթ միշտ էլ լինելու է: Կսեղմեն հայ ըմբշամարտիկի ձեռքը պարտված թուրք կամ ադրբեջանցի մրցակիցները, դա նրանց խնդիրն է: Մեզ համար կարևորը հաղթել է, ու ոչ միայն գորգի վրա, այլ նար վարքով, պահվածքով ու հոգեբանությամբ:

Армен Бабаларян
© Sputnik / Hayk Petrosyan
Արմեն Բաբալարյան
160
թեգերը:
Հայաստան
Ըստ թեմայի
1 ոսկե և 2 արծաթե մեդալներ` ըմբշամարտի երիտասարդների աշխարհի առաջնությունից
Ազատ ոճի ըմբշամարտի հավաքականը սերնդափոխության կարիք ունի. Հաբեթնակ Կուրղինյան
Ի՞նչ կանի ըմբշամարտի աշխարհի չեմպիոնը, եթե դառնա ԱԺ պատգամավոր