ԵՐԵՎԱՆ, 11 փետրվարի — Sputnik. Մինչև 24 տարեկան ոչ մի բռնցքամարտիկ չի համաձայնի ռինգ դուրս գալ հայ բռնցքամարտիկ Գոռ Երիցյանի հետ։ Այսօր լրագրողների հետ զրույցում այս կարծիքը հայտնեց Punch Boxing փրոմոութերական ընկերության հիմնադիր Արամ Դավթյանը։
Փետրվարին Երիցյանը 10–րդ հաղթանակն է տարել Սոչիում` նոկաուտով հաղթելով արգենտինացի Մաքսիմիլյանո Լեոնել Սկալզոնեին։
Մեկնաբանելով արգենտինացու և Երիցյանի մարտը` Դավթյանը նշեց, որ նա վտանգավոր հակառակորդ է, 16 մարտից 12–ն ավարտել է ժամանակից շուտ։ Բայց հայ բռնցքամարտիկին հաջողվել է շատ արագ ավարտել մենամարտը։
Ինչ վերաբերում է ապագայում տիտղոսի հնարավոր պաշտպանությանը, ապա, ինչպես նշեց փրոմոութերական ընկերության հիմնադիրը, Գոռը հազիվ թե մրցի գոտու պաշտպանության համար։
Նա նշեց, որ Երիցյանն արդեն 24 տարեկան է, և մարզիկը կտեղափոխվի այլ տարիքային կարգ։
WBO վարկածով չեմպիոնը խոստովանեց, որ հասցրել է լավ նախապատրաստվել մենամարտին։
«Առաջին հարվածից հետո մտածում էի, որ մարտը ժամանակից շուտ կավարտվի, բայց ոչ այդքան արագ։ Երկրորդ հարվածից հետո ձեռքի թեթև վնասվածք ստացա, բայց հարվածն այնքան ուժեղ էր, որ հակառակորդի աչքերից հասկացա` նա գնաց», – նշեց Երիցյանը։
Դեկտեմբերին Երիցյանը ջախջախել է ֆիլիպինցի մրցակից Ալվին Լագումբային` երիտասարդների շարքում WBO վարկածով չեմպիոնի կոչման համար։
