ԵՐԵՎԱՆ, 16 նոյեմբերի – Sputnik. ՀՀ վարչապետի պաշտոնակատար Նիկոլ Փաշինյանը միջնորդություն է ներկայացրել ՀՀ նախագահին՝ Սիմոն Մարտիրոսյանին «Հայրենիքին մատուցած ծառայությունների համար» 2-րդ աստիճանի շքանշանով, իսկ Գոռ Մինասյանին Երախտագիտության մեդալով պարգևատրելու համար։
Հիշեցնենք, որ Հայաստանի ծանրամարտի տղամարդկանց թիմի անդամ, Օլիմպիական խաղերի արծաթե մեդալակիր Սիմոն Մարտիրոսյանը Թուրքմենստանում ընթացող աշխարհի առաջնությունում 109 կգ քաշային կարգում, ֆանտաստիկ ելույթով ու երկամարտի 435 կգ արդյունքով նոյեմբերի 9-ին նվաճել է աշխարհի չեմպիոնի կոչումը։ Միաժամանակ նա նաև աշխարհի նոր ռեկորդներ է սահմանել հրում վարժությունում ու երկամարտում։
Աշխաբադում անցկացված աշխարհի առաջնության վերջին օրը գերծանր քաշային կարգում, երկամարտի 450կգ արդյունքով աշխարհի փոխչեմպիոն դարձավ ծանրորդ Գոռ Մինասյանը:
Երկու մարզիկներն էլ Ռիոյում անցկացված Օլիմպիական խաղերի արծաթե մեդալակիրներ են։ Հաշվի առնելով, որ Մարտիրոսյանն ընդամենը 21 տարեկան է, իսկ Մինասյանը` 24, իհարկե, նրանց հետ է կապված Տոկիոյում կայանալիք օլիմպիադայում ոսկի նվաճելու հույսերը։ Չնայած տարիքին, Մարտիրոսյանն արդեն համաշխարհային մի քանի ռեկորդների հեղինակ է։
