ԵՐԵՎԱՆ, 9 հոկտեմբերի — Sputnik. Հայ հարձակվող Յուրա Մովսիսյանը, որը ելույթ է ունենում ամերիկյան «Չիկագո Ֆայր» ակումբում, հայտնել է, որ վերադառնում է Հայաստանի հավաքական։ Այս մասին նա գրել է ֆեյսբուքյան իր էջում։
Յուրան 2010 թվականից 2015 թվականը Հայաստանի հավաքականի կազմում 35 խաղ է անցկացրել ու 10 գոլի հեղինակ դարձել։
«Երեք տարի անց վերադարձա։ Այս ընթացքում չեմ խաղացել ազգային թիմի կազմում։Բայց որոշեցի վերադառնալ ու նորից խաղալ։ Չէի կարծում, որ դա տեղի կունենա, բայց հիմա նոր ու ազատ Հայաստան է, ոչինչ չի կարող ինձ ավելի մեծ հպարտություն պարգևել, քան ազգային հավաքականում խաղալը», – ընդգծել է ֆուտբոլիստը։
Նա հույս է հայտնել, որ հոկտեմբերի 13-ին ու 16-ին կայանալիք խաղերին մարդաշատ մարզադաշտ կտեսնի։ Նրա խոսքով` երկրպագուների աջակցությունը կօգնի հավաքականին վերադառնալ հաղթանակի ճանապարհ։
31–ամյա հարձակվողին Հայաստանի հավաքական են հրավիրել Ազգերի Լիգայի Երևանում կայանալիք Ջիբլարթարի (հոկտեմբերի 13) ու Մակեդոնիայի (հոկտեմբերի 16) հետ խաղերին մասնակցելու։
