ԵՐԵՎԱՆ, 5 սեպտեմբերի – Sputnik. «Ուլիս» ֆուտբոլի ակումբի նախկին գլխավոր մարզիչ Գագիկ Սիմոնյանը հերքում է պայմանավորված հանդիպումներում ներգրավված լինելու և խաղադրույքներ կատարելով մեծ գումար վաստակելու մեղադրանքը, որը շրջանառվում է 2015 թվականից ի վեր։ Այս մասին նա ասաց Sputnik Արմենիա մամուլի կենտրոնում հրավիրված ասուլիսի ժամանակ։
«Երբ ինձ կանչեցին ԱԱԾ, պետն ասաց, որ հայկական ֆուտբոլի հեղինակության հետ եմ խաղում։ Ես այստեղ եմ, որ ասեմ իրականությունը։ Նշվում է 2-3 մլն դոլար գումար, բայց ես դրա հետ կապ չունեմ։ Ես երբեք ոչ մի խաղադրույք չեմ կատարել։ Իրենք իրենց խաղն արեցին, առան, կերան, ինձ ճամփու դրեցին»,- ասաց Սիմոնյանը:
Նա այժմ ստորագրությամբ ազատ է արձակվել, բայց դատական գործընթացները դեռևս չեն ավարտվել։
«Ինձ առանց որևէ ապացույցի, անմեղ տեղը տարել են ԱԱԾ, ձերբակալել են, որ ցույց տան, թե Հայաստանում տեղի է ունենում պայքար պայմանավորված խաղերի դեմ: Իմ դեմ ոչ մի ապացույց չկա: Հարցաքննության է հրավիրվել մոտ 20 ֆուտբոլիստ: Ես 2015 թվականին 6 ամիս ազատազրկվեցի, այնուհետև ինձ ազատ արձակեցին, իսկ հիմա դատական գործընթացն անտեղի հետաձգվում է»,-շեշտեց նախկին մարզիչը` առանց անուններ նշելու:
Մարզիչը նշեց, որ որևէ մեկին չի ցանկանում մեղադրել, քանի դեռ գործը վերջնականապես չի բացահայտվել։
«ԱԱԾ-ում ասում են՝ էս ի՛նչ եք արել մեր ֆուտբոլի հետ, էս ի՛նչ թվերի հետ եք խաղացել»,-ասաց Սիմոնյանը` պնդելով, որ ինքն էլ ոչնչից տեղյակ չի եղել:
47 տարեկան Սիմոնյանը չի պատրաստվում զենքը վայր դնել և վստահեցնում է` գնալու է մինչև վերջ, որպեսզի ապացուցի իր անմեղությունն ու օգնի բացահայտել իրական մեղավորներին:
Հիշեցնենք, որ 2015 թվականի նոյեմբերին ԱԱԾ-ն հաղորդել էր, որ հայկական Ֆուտբոլային «Ուլիս» ակումբի գլխավոր մարզիչ Գագիկ Սիմոնյանը, ֆուտբոլիստ (պաշտպան) Հայկ Հունանյանը, «Ուլիս 2» ակումբի ադմինիստրատոր Արա Ազարյանը և մարզչի օգնական Ռուբեն Առուշանյանը հանցավոր համաձայնությամբ, բուքմեյքերական գրասենյակից մեկի ոմն աշխատակցի միջոցով, կատարել են 1000-3000 ԱՄՆ դոլար խաղադրույքներ և, ապահովելով խաղերի կանխատեսելի արդյունքները, ստացել են ապօրինի շահույթ, որը համապատասխան մասնաբաժիններով բաշխվել է վերը նշված անձանց և առանձին ֆուտբոլիստների միջև:
