ԵՐԵՎԱՆ, 21 մայիսի — Sputnik. «Արսենալի» նախկին ավագը` Միկել Արտետան, որը Արսեն Վենգերի հետնորդի գլխավոր հավակնորդ էր համարվում, «զինագործների» գլխավոր մարզիչ չի դառնա։ Այս մասին հայտնում է Daily Mail-ը։
«Արսենալի» ղեկավարությունը` ի դեմս Սթեն Կրոնկեի ու տնօրեն Իվան Գազիդիսի, որոշել է «ավելի փորձառու մարզչի» ընդունել։
Որոշ տվյալների համաձայն` 36-ամյա Արտետան ավելի վաղ «Արսենալի» առաջ պայման է դրել`հասկացնելով, որ պատրաստ է գլխավորել ակումբը, եթե թիմի տրանսֆերները վերահսկելու լիարժեք հնարավորություն ստանա։
Հայտնի չէ` Արտետայի այս պահանջն է ազդել վերջնական որոշման վրա, թե ոչ։
Նախորդ խաղաշրջանի ընթացքում Արտետան փոխարինում էր «Մանչեսթեր Սիթիի» գլխավոր մարզիչ Խոսեպ Գվադիոլային։
Այսօր ավելի վաղ բրիտանական լրատվամիջոցները հայտնել էին, որ իսպանական «Սևիլյայի», մոսկովյան «Սպարտակի» ու ֆրանսիական «Պարի Սեն-Ժերմենի» նախկին մարզիչ Ունայ Էմերին Մեծ Բրիտանիայի մայրաքաղաք է ժամանել «Արսենալի» հետ բանակցություններ վարելու համար։
Այդ կապակցությամբ հիշատակվել է նաև «Արսենալի» նախկին հարձակվող, ֆրանսիացի Թիերի Անրիի անունը։ Ըստ լրատվամիջոցների` այս շաբաթ պետք է նրա հետ բանակցեն։
