ԵՐԵՎԱՆ, 21 մայիսի —Sputnik, Անի Լիպարիտյան. Հայտնի ֆուտբոլիստ Սարգիս Հովսեփյանը մեծ օգուտ է բերել ինչպես «Զենիթ» ֆուտբոլային ակումբին, այնպես էլ Հայաստանի հավաքականին։ Այս մասին ասել է ֆուտբոլիստ, ԽՍՀՄ սպորտի վարպետ, «Զենիթի» ակադեմիայի տնօրեն Անատոլի Դավիդովը` պատասխանելով Sputnik Արմենիայի հարցին։
Դավիդովը և մեկ այլ ռուս ֆուտբոլիստ, «Զենիթ-2»-ի գլխավոր մարզիչ Կոնստանտին Զիրյանովը հանդիպեցին «Ռուսկոյե զարուբեժյե» հայրենակիցների երիտասարդական կազմակերպությունների պետերբուրգյան XI ֆորումի մասնակիցների հետ։
Խոսելով «Զենիթի» կազմում խաղացած (1998-2003 թթ.) միակ հայի մասին՝ Դավիդովը նշեց, որ Սարգիս Հովսեփյանը կյանքում հիանալի, ուշադիր և բարեսիրտ մարդ է, սակայն խաղի մեջ խիստ է։
Նա շնորհակալություն է հայտնում Հովսեփյանին, որ խաղացել է «Զենիթի» կազմում, օգնել է արդյունքի հասնել և իր ներդրումն է ունեցել թիմի կայացման հարցում։
«Նրա վարպետությունն օգնում էր զարգացնել մեր թիմը», — ասաց խոսնակը։
Դավիդովը պատմեց, որ ժամանակին նա ստիպված էր խաղալ Վրաստանի և հայկական «Արարատի» ֆուտբոլիստների դեմ։ Լեգենդար ֆուտբոլիստը նշեց, որ նա շարունակում է շփվել ավագ սերնդի հայ ֆուտբոլիստների հետ։
Նշենք, որ «Ռուսկոյե զարուբեժյե» երիտասարդական ֆորումին 44 երկրի ներկայացուցիչ է մասնակցում։ Հայաստանյանմասնակիցները երեք բաժիններում են աշխատում` «ԶԼՄ», «Էկոնոմիկա» և «Արվեստագիտություն»։ Նրանք մասնակցում են վարպետության դասընթացներին, այցելում թանգարաններ, պատկերասրահներ և խոշորագույն ԶԼՄ-ների խմբագրություններ։
Միջոցառման կազմակերպիչը Սանկտ Պետերբուրգի արտաքին կապերի կոմիտեն է, նախագծին աջակցում է ՌԴ ԱԳՆ-ն։
«Ռուսկոյե զարուբեժյե» ֆորումը կտևի մինչև մայիսի 22-ը։
