ԵՐԵՎԱՆ, 2 մայիսի — Sputnik. Հայաստանի հավաքականի առաջատարը Եվրոպայի առաջնության եզրափակչում ոչ մի հնարավորություն չտվեց վրացական արմատներով, սերբիան ներկայացնող Միխեիլ Կաջայային: Հայ ըմբիշը հերթական անգամ միավոր չտվեց մրցակցին և հաղթեց 7:0 հաշվով` չորրորդ անգամ նվաճելով Եվրոպայի չեմպիոնի կոչումը:
Օլիմպիական խաղերի, աշխարհի ու Եվրոպայի եռակի չեմպիոն Արթուր Ալեքսանյանը 97 կգ քաշային կարգում բոլոր մասնագետների ու երկրպագուների կողմից հաղթողի հիմնական հավակնորդն էր համարվում, ու մեր հավաքականի առաջատարը դա ապացուցեց այս առաջնությունում:
Մինչև եզրափակիչ հասնելը Արթուրը երեք գոտեմարտ անցկացրեց ու ոչ մի միավոր չտվեց իր ախոյաններին: 1/8 եզրափակիչում հայ ըմբիշը 9:0 հաշվով պարտության մատնեց մեր հայրենակից Ռոբերտ Ավանեսյանին, որը ներկայացնում էր Իսրայելը:
Քառորդ եզրափակչում Ալեքսանյանի «զոհը» դարձավ հույն Լաոկրադիս Կեսիդիսը, որի նկատմամբ հայ ըմբիշը հաղթանակ տոնեց 8:0 հաշվով: Իսկ կիսաեզրափակչում առավելության հասավ ֆինն Մատի Էլիաս Կուսմանենի նկատմամբ:
Եզրափակչում Ալեքսանյանը Եվրոպայի չեմպիոնի կոչումը վիճարկեց սերբ Միխեիլ Կաջայայի հետ: Հայ ըմբիշը Եվրոպայի չեմպիոնի կոչումը վերջին անգամ նվաճել էր 2014 թվականին: Իսկ հաջորդ երկու առաջնություններում Ալեքսանյանը զբաղեցրել էր երկրորդ ու երրորդ տեղերը:
