ԵՐԵՎԱՆ, 10 ապրիլի — Sputnik. Հանրահայտ թենիսիստուհի Սերենա Ուիլյամսը հայտարարել է, որ թենիսիստի կարիերան ավարտելու հիմքեր չի ունեցել և չունի։ Այս մասին նա հայտնել է Bloomberg Business radio show ռադիոկայանին տված հարցազրույցում։
Միլիոնատեր Ալեքսիս Օհանյանի կինը Ավստրալիայի բաց առաջնությունում հաղթանակ տանելուց հետո մրցումների չի մասնակցել 2017 թվականի հունվարից։
2017 թվականի սեպտեմբերին ծնվեց «Մեծ սաղավարտ» մրցաշարի 23-ակի հաղթող Սերենա Ուիլյամսի ու Ալեքսիս Օհանյանի դուստրը։ Աղջկան կոչեցին հոր պատվին` Ալեքսիս Օլիմպիա Օհանյան։
«Գիտեմ, որ մի գեղեցիկ օր կարթնանամ և կասեմ` ավարտեցի։ Գիտեմ, որ երբ դա տեղի ունենա, ես կզգամ այդ պահը, բայց նման զգացողություն դեռ չունեմ։ Անցյալ տարի, այն ամենից հետո, ինչ կատարվեց, ևս չեմ ունեցել։ Երբ լինի, անպայման կիմանամ», — Tennis World USA ամսագիրը մեջբերում է ամերիկուհու խոսքերը։
Դեկտեմբերի վերջին աշխարհի նախկին առաջին ռակետը ելույթ ունեցավ Աբու Դաբիում անցկացվող մրցաշարում, դստեր ծնվելուց հետո հանդես եկավ Ինդիան Ուելսում անցկացվող WTA մրցաշարում, որտեղ նա հասավ մինչև երրորդ շրջան և պարտվեց քրոջը` Վինուսին։ Մարտի վերջին Ուիլյամսը չկարողացավ հաղթահարել Մայամիում անցկացվող մրցաշարի առաջին շրջանը` զիջելով ճապոնացի Նաոմի Օսակային։
