ԵՐԵՎԱՆ, 17 նոյեմբերի — Sputnik. «Մանչեսթեր Յունայթեդի» ամենավառ խաղացողներից մեկի` Հենրիխ Մխիթարյանի բացառիկ պատմությունը ներկայացվել է ֆուտբոլային ակումբի youtube–ի ալիքով։
Ֆիլմը պատմում է հայ կիսապաշտպանի կյանքի մասին, որի էքսկլյուզիվ կադրերը Մխիթարյանն ավելի վաղ տեղադրել էր Facebook սոցցանցի իր էջում։
Ֆիլմը ցուցադրում է, թե ինչպես հոր հետքերով գնալու ու պրոֆեսիոնալ ֆուտբոլիստ դառնալու Հենրիխի երազանքը 2006 թվականին 17 տարեկանում նրան բերեց հայկական «Փյունիկ» ֆուտբոլային ակումբ։ Այնուհետև հանդիսատեսը կծանոթանա այն պատմությանը, թե ինչպես Մխիթարյանը միացավ Դոնեցկի «Մետալուրգին» և դարձավ ամենաերիտասարդ ավագն ակումբի պատմության ընթացքում։
Ֆուտբոլիստի կյանքի բոլոր փուլերը ներկայացված են ֆիլմում. չորս խաղաշրջան «Շախտյոր» ակումբի կազմում, տեղափոխություն Գերմանիա, միացում Դորտմունդի «Բորուսիային» և, վերջապես, Old Trafford մարզադաշտում նրա աստղային հայտնությունը։
Ֆիլմը նաև ցույց է տվել ֆուտբոլիստի հավատարիմ երկրպագուներին հայրենիքում։ Նրանցից մեկը` Արայիկ Սիմոնյանը, մի ուրախ պատմություն է պատմել։
«75-ամյա մայրս միշտ ինձ հետ միասին դիտում է Հենրիխի խաղերը։ Երբ նա գոլ է խփում, մայրս ինձնից բարձր է «գոլ» ճչում։ Այն հպարտության զգացումը, որը նրան է պարգևում Մխիթարյանը, 10 տարով երկարացնում է նրա կյանքը»,– ասել է ֆուտբոլիստի երկրպագուն։
Քանի որ Հենրիխն առաջին հայն է, որը ելույթ ունեցավ պրեմիեր լիգայի ակումբի կազմում, նա իր երկրում կարևոր գործիչ դարձավ։ Շատերի համար Հենոյի պրոֆեսիոնալիզմն ու հաջողությունները «նոր Հայաստանն են» ներկայացնում, և նրան հաճախ «Հայաստանի հպարտություն» են անվանում։
MUTV–ն (Manchester United TV) հեռուստատեսային ալիք է, որը պատկանում է «Մանչեսթեր Յունայթեդ» անգլիական ֆուտբոլային ակումբին։ Ալիքը սկսեց եթեր դուրս գալ 1998 թվականի սեպտեմբերի 10-ին։
