ԵՐԵՎԱՆ, 4 հոկտեմբերի — Sputnik. Ճիշտ է` ընտրական փուլին մնացել է երկու հանդիպում, և մենք այլևս շանս չունենք աշխարհի առաջնությանը մասնակցելու, բայց նրանք ովքեր մտածում են, որ մեր համար ամեն ինչ ավարտված է, սխալվում են: Աշխարհի առաջնության 2018-ի ընտրական փուլի Լեհաստան — Հայաստան խաղին ընդառաջ լրագրողների հետ հանդիպման ժամանակ ասաց Հայաստանի հավաքականի ավագ Հենրիխ Մխիթարյանը ։
«Մենք ազգ ենք ներկայացնում ու խաղում ենք ազգի համար: Մեր հավաքականը կոչվում է ազգային»,- թիմի տրամադրությունն այսպես ներկայացրեց Հենրիխ Մխիթարյանը:
Աշխարհի առաջնության Հայաստան-Լեհաստան ընտրական խաղը կկայանա վաղը` հոկտեմբերի 4-ին:
Ընտրական նախորդ երկու հանդիպումներից հետո կարծիքներ հնչեցին, որ Հենրիխ Մխիթարյանը հավաքականի խաղերին այնքան էլ չի նվիրվում, ինչպես «Մանչեսթեր Յունայթեդի» խաղերին: Հենրիխը ասուլիսի ժամանակ խոսեց նաև այդ մասին:
«Ես երբեք տարբերություն չեմ դրել, թե որ թիմում եմ խաղում: Գուցե ինչ-որ տարբերություն կա հավաքականի կամ «Մանչեսթեր Յունայթեդի» խաղերի ժամանակ, բայց ես միշտ էլ անմնացորդ նվիրվել եմ իմ թիմին»,- ասաց ֆուտբոլիստը:
Նա զերծ մնաց ընտրական փուլն ամփոփելուց` նշելով, որ դեռևս երկու խաղ ունենք անցկացնելու:
Մխիթարյանը հույս է հայտնել, որ կկարողանան այդ խաղերում հասնել արդյունքի:
