ԵՐԵՎԱՆ, 21 սեպտեմբերի — Sputnik. Հայաստանի ֆուտբոլի ֆեդերացիայի կարգապահական կոմիտեի հերթական նիստի ժամանակ որոշվել է 2 տարով որակազրկել Երևանի «Արարատի» գլխավոր մարզիչ Արկադի Անդրեասյանին` «Գանձասար-Կապանի» հետ խաղում ցուցադրած ոչ մարզական պահվածքի համար։ Այս մասին հայտնում է ՀՖՖ-ի պաշտոնական կայքը։
«Որոշվել է Արկադի Անդրեասյանին ծառայողական պարտականությունները կատարելու իրավունքից զրկել 2 տարի (մինչև 20/09/2019թ.) ժամկետով: Իսկ «Արարատ»-«Գանձասար-Կապան» խաղն անավարտ մնալու համար, ՀՖՖ-ի կարգապահական կանոնակարգի 15-րդ հոդվածի 7-րդ կետի համաձայն` «Արարատ» թիմին գրանցել տեխնիկական պարտություն, իսկ «Արարատ» ֆուտբոլային ակումբին տուգանել 250 հազար դրամով»,– նշված է հաղորդագրության մեջ:
Հայաստանի Բարձրագույն խմբի առաջնության 6-րդ տուրի` «Արարատ»-«Գանձասար-Կապան» (0:2) խաղում միջադեպ էր գրանցվել:
Հանդիպման հիմնական ժամանակին ավելացրած առաջին րոպեին գլխավոր մրցավար Արտակ Սիմոնյանը դադարեցրել էր խաղն ու «Արարատի» գլխավոր մարզիչ Արկադի Անդրեասյանից պահանջել լքել տեխնիկական գոտին: Վերջինս, սակայն, բարկացել էր և չէր համաձայնել անել դա: Հանդիպումը չէր վերսկսվել, և մրցավարն ազդարարել էր հանդիպման ավարտը:
Արկադի Անդրեասյանը 1969-78 թթ. Երևանի «Արարատի» կազմում հանդես է եկել ԽՍՀՄ առաջնության բարձրագույն խմբում։ Անցկացրել է 242 խաղ, խփել 61 գոլ։ Օլիմպիական խաղերի բրոնզե մեդալակիր է (1972), 1973 թ. ԽՍՀՄ չեմպիոն, 1971 և 1976 (գարնանային) թթ. առաջնությունների արծաթե մեդալակիր, 1973 և 1975 թթ. ԽՍՀՄ գավաթակիր։
