ԵՐԵՎԱՆ, 17 օգոստոսի — Sputnik. Նետաձգության Հայաստանի պատանեկան հավաքականի երկու անդամներ՝ Արման Բալդիյանը և Լևոն Պողոսյանը պատրաստվում են հոկտեմբերի սկզբին Արգենտինայում կայանալիք աշխարհի պատանիների և երիտասարդների առաջնությանը, որը 2018 թվականի պատանեկան օլիմպիական խաղերի վարկանիշային մրցում է: Այս մասին տեղեկացնում է ՀՀ ՀԱՕԿ պաշտոնական էջը։
Նրանք ազգային հավաքականի գլխավոր մարզիչ Բորիս Վասիլյանի ղեկավարությամբ արդեն մեկ ամիս ուսումնամարզական հավաք են անցկացնում Մարտունիում գտնվող ԵԿՄ ճամբարում:
ՀԱՕԿ լրատվականի հետ զրույցում Բորիս Վասիլյանն ասել է, որ այնտեղ պայմանները շատ լավ են: «Գրեթե մեկ ամիս էլ մնալու ենք: Արմանն ու Լևոնը վերջին շրջանում բավականին լավ արդյունքներ են ցույց տալիս, ինչը Արգենտինայում բարձր տեղեր զբաղեցնելու հույսեր է ներշնչում»:
Սեպտեմբերի սկզբին երկու թիմով մեկնելու են Բաթում՝ մասնակցելու միջազգային մրցաշարի, այնտեղից էլ` Թբիլիսի, որտեղ նույնպես միջազգային մրցաշար է լինելու: Այնուհետև, ամենայն հավանականությամբ, Սևանի ավազանում սեպտեմբերի 14-ին կտրվի «Հայկի նետեր» ավանդական միջազգային մրցաշարի մեկնարկը, որին մասնակցելու հայտ ներկայացրել են Վրաստանից՝ Բաթումի եւ Թբիլիսիի, Ղազախստանի, Ղրղըզստանի և Յակուտիայի թիմեր:
