ԵՐԵՎԱՆ, 6 հուլիսի – Sputnik. Նիկշա Բավցևիչը ՀԱՕԿ լրատվականի հետ հարցազրույցում խոսել է իր առաջին տպավորությունների և աշխարհի առաջնությունում մեր շանսերի մասին:
«Առաջին անգամ եմ Հայաստանում: Հասցրել եմ մի փոքր ծանոթանալ քաղաքին: Հայաստանի մասին ունեցածս տեղեկությունը համացանցից է: Ես գիտեմ, որ շատ հին երկիր է` հայրենասեր մարդկանցով, ինչը շատ լավ է: Մարդիկ շփվող են, ընկերասեր և օգնելու պատրաստակամ: Ես հաճելիորեն զարմացա, երբ իմացա, որ ուտելը ձեզ մոտ ազգային հոբբի է: Դա շատ համեղ հոբբի է (ծիծաղում է,- խմբ)»,- ասել է Բավցևիչը:
Ըստ նրա` Երևանը հակասություններով լի քաղաք է, կարծես, այստեղ հին ավանդույթների և ժամանակակից կյանքի պայքար լինի:
«Եվս մեկ առանձնահատկություն եմ նկատել. շատ եմ ճամփորդել, բայց երբեք ոչ մի քաղաքում այդքան վարդեր չեմ տեսել: Ինձ գրավել են նաև որմնանախշերը: Հայաստանն առաջին քրիստոնեական երկիրն է, հետևաբար՝ այստեղ ուսումնասիրելու բազմաթիվ վայրեր կան»,- նշել է մարզիչը:
Նա խոսել է նաև Հայաստանի հավաքականը գլխավորելու որոշման մասին:
«Իմ գործակալ Սևակ Կեուչյանը հայ է, և նա է ինձ ասել այս հնարավորության մասին: Ինձ համար նոր մարտահրավեր էր ազգային հավաքական գլխավորելը: Հետո հայրս աշխարհագրագետ է, նա ինձ պատմել էր Հայաստանի պատմության, ցեղասպանության մասին, ինչը խթանեց, որ ես ընդունեմ առաջարկը: Ցանկացած մարզչի համար պատիվ է գլխավորել ազգային հավաքական»,- ասել է Բավցևիչը:
Նա ընդգծել է, որ Հայաստանի բասկետբոլի ֆեդերացիան ցանկանում է այս մարզաձևը վերադարձնել եվրոպական նախկին մակարդակին:
«Մ 20 տարեկանների հավաքականը մեծ ներուժ ունի: Հաճելիորեն զարմացա, երբ տեսա խաղացողների, որոնք կարող են խաղալ եվրոպական մակարդակով: Ֆեդերացիան անհավատալի էներգիա և գումար է ներդնում, որոնք փոխկապակցված են,- ասել է մարզիչը:
Բավցևիչը բասկետբոլիստներից շատերի հետ խոսել է հեռախոսով, ներկայացրել իրեն ու իր ծրագրերը և այժմ սպասում է, որ նրանք ժամանեն Հայաստան:
«Երկու հիմնական նպատակ ունեմ: Մեր ֆեդերացիան մեծ ջանքեր է գործադրում սփյուռքի հայ բասկետբոլիստներին հավաքական բերելու համար: Պետք է աջակցեմ նրանց: Կարծում եմ, մոտ ենք այնպիսի խաղացողների խումբ ձևավորելուն, որը հանդես կգա առաջիկա երկու տարիներին: Առաջին նպատակս է` ազգային թիմի նոր մշակույթ ձևավորելը: Դա շատ կարևոր է խաղացողների համար: Ես ունեմ այդ փորձը, գուցե դրա համար են ինձ նշանակել գլխավոր մարզիչ: Բավարար չէ միայն ասել` ես հայրենասեր եմ, սիրում եմ ազգային խորհրդանիշերը: Այդ հայրենասիրությունը պետք է ներդնել հավաքականում: Չէ՞ որ այստեղ ոչ թե գումարի համար ես խաղում, այլ հպարտության և սիրո»,-ասել է նա:
Երկրորդ նպատակը, ըստ Բավցևիչի, հավաքականի հետ լավագույն արդյունքի հասնելն է:
