Պրեմիեր լիգայի 2016/17 թվականների մրցաշրջանի անհաջողակներից մեկը Լոնդոնի «Արսենալն» էր: Վերջին 20 տարվա ընթացքում թիմը չկարողացավ Չեմպիոնների լիգայի ուղեգիր վաստակել:
Որպես մխիթարություն Արսեն Վենգերի ու նրա ֆուտբոլիստների համար եղավ հաղթանակը Անգլիայի գավաթի խաղարկությունում: Այս հաղթանակը Եվրոպայի լիգայում հանդես գալու հնարավորություն տվեց, բացի այդ դարձավ ռեկորդային՝ 13-րդը «Արսենալի» համար:
Բայց «Արսենալի» երկրպագուների համար հաղթանակը Անգլիայի գավաթի խաղարկությունում շատ բարձր արդյունք չի համարվում: Թիմն Անգլիայի չեմպիոնի տիտղոսը վերջին անգամ նվաճել է 2004 թվականին, ու վերջին մի քանի տարվա ընթացքում անընդհատ հնչում են Արսեն Վենգերին գլխավոր մարզչի պաշտոնից հեռացնելու առաջարկությունները:
Անկասկած հիմնական պատճառը թիմի արդյունքներն են: Առաջնությունների ընթացքում «Արսենալը» չի կարողանում կայուն խաղ ցուցադրել: Վենգերին չի հաջողվում առանց առանցքային խաղացողների վնասվածքների անցնել ֆուտբոլային մարաթոնը: Եվ այդ պատճառով հիանալի խաղերին, շատ հաճախ հաջորդում են ձախողումները: Պրեմիեր լիգայում հինգերորդ տեղը զինագործների համար անընդունելի արդյունք է: Թիմն իրենից բարձր տեղ զբաղեցնող մրցակիցներին զիջում է արդյունավետությամբ ու բոլորից շատ գնդակ է բաց թողել:
Չիլիացի Ալեքսի Սանչեսը, ստանձնելով առաջատարի դերը, չի կարողանում «միայնակ» առաջ տանել թիմին: Իհարկե, վերջին երկու տարվա ընթացքում եղել են տրասնֆերներ, բայց Թյերի Անրիի ու Պատրիկ Վիեյրայի նման խաղացողներ «Արսենալում» առայժմ չկան:
Նոր մրցաշրջանի մեկնարկից առաջ ո՞վքեր կարող են համալրել «Արսենալի» կազմը: Նախևառաջ ամենախոշոր ձեռքբերումը կլինի Լիոնի «Օլիմպիկի» հարձակվող Ալեքսանդր Լյակազետի տեղափոխությունը: Ընդ որում` «Արսենալի» համար ռեկորդային գումարով՝ 52 մլն ֆունտ: Այսինքն ունենալով Օլիվյե Ժիռույին, Դենի Ուելբեկին` միևնույնն է` կենտրոնական հարձակվող է ձեռք բերվում:
Համացանցում կային տեղեկություններ, որ «Արսենալը» 125 միլիոն ֆունտ է պատրաստվում առաջարկել «Մոնակոյի» հարձակվող Կիլիան Մբապեի համար: Սակայն առայժմ այդ լուրերը պաշտոնական կարգավիճակ չեն ստանում, բացի այդ էլ «Արսենալին» շատ դժվար կլինի մրցակցել այլ հզոր ակումբների հետ (առաջին հերթին դա վերաբերում է Մադրիդի «Ռեալին»), որոնք նույնպես ցանկանում են իրենց կազմում տեսնել ֆրանսիացի տաղանդին: Գումարած այս ամենին դեռ հարց է` արդյո՞ք Մբապեն ուզում է տեղափոխվել «Արսենալ»: Իսկ «Մոնակոյի» գլխավոր մարզիչ Լեոնարդու Ժարդիմն էլ նշել է, որ ամեն ինչ կանեն Մբապեին իրենց թիմում պահելու համար:
Եվս մեկ որպես հավանական տեղափոխություն հնչում է Ռիյադ Մահրեզի տեղափոխությունը «Լեսթերից»: Ալժիրցի ֆուտբոլիստը երկար սպասեց «Բարսելոնայի» հրավերին ու, չստանալով այն, հիմա մտածում է այլ թիմ տեղափոխվելու մասին ու դեմ չէ «Արսենալի» կազմը համալրելուն: Լյակազետն ու Մահրեզը, իհարկե, կարող են ուժեղացնել «Արսենալի» խաղը: Պարզ է, որ թիմում կբարձրանա մրցակցությունը: Չէ՞ որ «Արսենալի» կազմում հիմա էլ կան շատ բարձրակարգ ֆուտբոլիստներ: Բայց, արդյո՞ք Վենգերին կհաջողվի թիմը համալրել առանց կորուստների:
Մասնավորապես Էկտոր Բելյերինի հեռանալու մասին շատ խոսակցություններ կան: Իսկ երիտասարդ իսպանացին նախորդ մրցաշրջանում շատ լավ տպավորություն թողեց: Բելյերինով հետաքրքրված է «Բարսելոնան»: Չի բացառվում, որ եթե ձախողվի Կիլիան Մբապեյի տրանսֆերը «Արսենալ», ապա լոնդոնյան թիմը իր հայացքն ուղղի դեպի Անտոնի Մարսիալը, որը այնքան էլ «լավ» չի զգում իրեն «Մանչեսթեր Յունայթեդում»:
Անկախ ամեն ինչից, «Արսենալին» ու Արսեն Վենգերին ինչ-որ մի նոր բան է հարկավոր անել: Լոնդոնյանի թիմի խաղային ձեռագրում շատ բան չի փոխվել, բայց «Արսենալի» խաղը կորցրել է իր «փայլը»: Միգուցե այս առաջնությունում հնարավոր կլինի հղկել սխալները ու արդեն ոչ միայն որպես հավակնորդ խաղալ, այլ իրական մրցակից դառնալ Անգլիական Պրեմիեր լիգայի տիտանների հետ պայքարում: Չէ՞ որ «Արսենալը» հենց այդպիսի թիմ է եղել: Տեսնենք, ցույց կտա ժամանակը: (Շարունակելի)
