ԵՐԵՎԱՆ, 26 հունիսի — Sputnik. Խարկովում կայացած բռնցքամարտի Եվրոպայի առաջնության չեմպիոն Հովհաննես Բաչկովը (64 կգ քաշային կարգ), վերադառնալով հայրենիք, հարցազրույց է տվել ՀԱՕԿ լրատվականին` նշելով, որ մինչև վերջ չի գիտակցում` ինչ է արել:
«Մեծ ուրախություն եմ զգում: Այս Եվրոպայի առաջնությունն ինձ համար չորրորդն էր: Վաղուց էի ձգտում հաղթանակի, բայց տարբեր պատճառներով չէր հաջողվում: Այս հաջողությունը իմ` մարզիչների հետ կատարած մեծ և քրտնաջան աշխատանքի արդյունքն է»,- նշել է Բաչկովը:
Մարզիկը նշել է, որ բոլոր մենամարտերն էլ հեշտ չեն եղել։ Իսկ հաղթական պայքարի առաջին ռաունդում դժվար է եղել, քանի որ ընտրած մարտավարությունը չէր անցնում: Սակայն, նրա խոսքով, երկրորդ և երրորդ ռաունդներում Բաչկովին հաջողվել է փոխել պայքարի ընթացքը և հասնել վաստակած հաղթանակին:
Հարցին, թե ո՞ւմ է նվիրել հաղթանակը, Բաչկովը պատասխանել է.
«Իմ բոլոր հաղթանակները ես միշտ նվիրում եմ հայ ազգին»:
