ԵՐԵՎԱՆ, 31 մայիսի — Sputnik. Ռուսաստանցի հայ թենիսիստ Կարեն Խաչանովն իր երկրպագուների աջակցությանն է ապավինում, գրում է «Спорт Экспресс»-ը։
Կարեն Խաչանովը հաջող մեկնարկ ունեցավ Ֆրանսիայի բաց առաջնությանը` հաղթանակ տանելով Նիկոլաս Ջարիի նկատմամբ։ Արդյունքում մարզիկն անցավ «Մեծ սաղավարտի» շարքի «Ռոլան Գարոսի» առաջնության երկրորդ շրջան։ Նրա հաջորդ մրցակիցը կլինի չեխ Տոմաշ Բերդիխի և գերմանացի Յան-Լենարդ Շտրուֆի միջև մենամարտի հաղթողը։
Խաչանովը նշեց, որ խաղը բավականին լարված և նյարդային էր, քանի որ նա մրցակցի հետ միևնույն միավորներով էր առաջ շարժվում։ Թենիսիստի խոսքով՝ երրորդ սեթից հետո նրա մրցակիցը զիջեց։
Միևնույն ժամանակ, նա ավելացրեց, որ նրան տպավորել է չիլիացի երկրպագուների աջակցությունը։
«Ընդհանրապես, չիլիացիները միշտ հզոր աջակցություն են ցուցաբերում։ Նույնիսկ այն ժամանակ, երբ մերոնք խաղում էին Չիլիում Դևիսի գավաթի խաղում, երկրպագուները մեծ ճնշում էին գործադրում։ Նրանք շատ հայրենասեր են և մի փոքր էլ՝ խենթ։ Սակայն ինձ դա չէր շեղում։ Հակառակը, դուր էր գալիս, որ նրանք դրայվ էին ստեղծում։ Նույնիսկ ինձ էին ոգևորում։ Իհարկե, ցանկալի կլիներ ավելի շատ իմ երկրպագուներին տեսնել տրիբունաներում։ Սակայն ինչ արած։ Գուցե, երբ մի փոքր ավել առաջ գնանք՝ կգան»,- ասաց Խաչանովը։
Կարեն Խաչանովը երիտասարդ հեռանկարային թենիսիստներից մեկն է։ Ավելի վաղ նա ATP թարմացված վարկանիշում 14-րդ հորիզոնականով բարձրացավ։
