Ըմբշամարտ

Արմեն Մկրտչյան. «Պետք է չեմպիոնին հաղթես, որպեսզի չեմպիոն դառնաս»

12
(Թարմացված է 19:24 09.05.2017)
Հայաստանի ազատ ոճի ըմբշամարտի ազգային հավաքականի գլխավոր մարզիչ Արմեն Մկրտչյանը, որի գլխավորությամբ մեր ընտրանին Եվրոպայի առաջնությունում երեք բրոնզե մեդալ նվաճեց, գոհ է հայ մարզիկների մասնակցությունից։

ԵՐԵՎԱՆ, 9 մայիսի — Sputnik. Թիմը լավ մարզավիճակում էր, պատրաստ պայքարի ու յուրաքանչյուրն իր չափով պայքարեց, ասել է Հայաստանի ազատ ոճի ըմբշամարտի ազգային հավաքականի գլխավոր մարզիչ Արմեն Մկրտչյանը Հայաստանի ազգային օլիմպիական կոմիտեի մամուլի ծառայությանը տված հարցազրույցում:

«Վարպետության աճը բերեց մեդալներ: Այս ընթացքում բոլորի հետ աշխատել ենք հոգեբանության, ֆիզիկական պատրաստվածության, տեխնիկայի, տակտիկայի վրա, փորձել վերացնել յուրաքանչյուրի թերությունները և սխալները»,- ասել է նա։

Նրա խոսքով` հոգեբանությունը շատ կարևոր է մարզիկի համար:

«Ես հավաքներում փորձում եմ նրանց ներարկել այն համոզմունքը, որ չեմպիոն դառնալու համար պետք է հաղթել չեմպիոնին, իսկ այդ պարագայում վիճակահանությունը նշանակություն չունի, կարևոր չէ, թե ում հետ երբ ես գոտեմարտելու»,- ասել է մարզիչը:

Մկրտչյանի նշել է, որ հաջորդ հավաքներում կշարունակեն աշխատել կատարելագործվելու վրա:

«Ըմբշամարտում մանրուքներ չկան: Գորգում ամեն մի սխալ շարժումը, բռնվածքը կարող է վճռորոշ լինել: Նպատակս դրանք բացառելն է կամ նվազագույնի հասցնելը: Մարզվելու, աշխատելու դեռ շատ տեղ կա: Պետք է վերլուծել յուրաքանչյուր ըմբիշի թերությունները, սխալները, դրանք վերացնել, կատարելագործվել, առաջ գնալ, որպեսզի արդյունքներում էլ առաջընթացը շարունակվի»,- ասել է նա:

12