Արտաշես Մադոյանը և Էմմա Պողոսովան

Նոր խոսք հայկական սուսերամարտում. հայ մարզուհին բարձրակարգ ներկայացավ

47
(Թարմացված է 16:27 12.04.2017)
Sputnik Արմենիա մամուլի կենտրոնում Հայաստանի սուսերամարտի ֆեդերացիայի ներկայացուցիչներն ամփոփեցին 2017 թվականի Աշխարհի երիտասարդների առաջնության արդյունքները։Անկախ Հայաստանի պատմության մեջ առաջին անգամ հայ սուսերամարտիկ Էմմա Պողոսովան տեղ է զբաղեցնում աշխարհի երիտասարդ ուժեղագույն խոցասուսերակիրների լավագույն ութնյակում:

ԵՐԵՎԱՆ, 12 ապրիլի-Sputnik. 154 մասնակից ավելի քան 80 երկրից։ Այս թվերը վերաբերում են 2017 թվականի Աշխարհի երիտասարդների առաջնությանը։ Հայ սուսերամարտիկ Էմմա Պողոսովան գերազանց հանդես եկավ և աննախադեպ արդյունք ներկայացրեց անկախ Հայաստանի սուսերամարտի պատմության մեջ` հասնելով մինչև քառորդ եզրափակիչ ու մտնելով ութնյակ։ Տրված գնահատականներում ավելորդ ժլատություն չարեց ՀՀ սուսերամարտի ֆեդերացիայի գլխավոր քարտուղար Արտաշես Մադոյանը։ 

Арташес Мадоян
© Sputnik/ Asatur Yesayants
ՀՀ սուսերամարտի ֆեդերացիայի գլխավոր քարտուղար Արտաշես Մադոյան

«Ելույթները սկսեցինք խմբային փուլից։ Մասնակիցները բաժանվում են խմբերի, մենամարտերն անցկացվում են 5 խոցումից։ 6 մենամարտ 6 հակառակորդի հետ և հաջող ելույթի դեպքում արդեն անցնում ենք հաջորդ փուլ։ Էմման ուներ 5 հաղթանակ խմբում և մտավ 128 ուժեղագույնների մեջ։ Սուսերամարտի առումով փոքր երկիր ենք, մեկնաբանները զարմացած էին, բոլորը շնորհավորում էին, որովհետև արդյունքը ողջունելի է, երկար տարիներ չենք ունեցել այս կարգի արդյունք»,- ասաց նա։

Ինքը` մարզուհի Էմմա Պողոսովան, պատմեց, որ առաջին մենամարտն ավստրալուհու հետ բարդ չէր, բայց մյուս մենամարտերն ավելի բարդ բնույթ ստացան։

«Հետո մենամարտերը Շվեյցարիայի, Եգիպտոսի և ԱՄՆ մարզուհիների հետ էին, ինձ մոտ հոգնածությունը դերը խաղաց, ֆիզիկապես ու նաև հոգեպես սպառված էի»,- ասաց մարզուհին։

Эмма Погосова
© Sputnik/ Asatur Yesayants
Սուսերամարտիկ Էմմա Պողոսովա

Բայց նա չի հուսահատվում, ասում է` սա փորձ էր, իսկ մյուս անգամ նույն և այլ մարզուհիների հետ հանդիպման ժամանակ հաղթանակ կտանի ու կնվաճի այն մեդալը, որ Հայաստանի համար անհասանելի է թվում։

Բանախոսները հավաստիացրին, որ վերջին տարիներին ավելի մեծ թվով երեխաներ են ընտրում սուսերամարտը, սակայն մարզաձևին տրվող ֆինանսավորումը քիչ է։ Սա այն դեպքում, երբ մենք ունենք տաղանդավոր երեխաներ ու լավ մարզիչներ։ ՀՀ սուսերամարտի ֆեդերացիայի գլխավոր քարտուղար Արտաշես Մադոյանը շեշտեց, որ մեր սուսերամարտիկները պետք է շատ մասնակցեն միջազգային մրցաշարերի։ Օրինակ` բարձրակարգ սուսերամարտիկները, նրա խոսքով, տարեկան 15-20 մրցման են մասնակցում։

Русская версия

47