Գոռ Մինասյան

Գոռ Մինասյանի և Ռուբեն Ալեքսանյանի նոր նվաճումները

45
Խորվաթիայի Սպլիտ քաղաքում այսօր ավարտվել է ծանրամարտի Եվրոպայի առաջնություը: Մրցումների վերջին օրը արգասաբեր էր հայ ծանրորդների համար: Սիմոն Մարտիրոսյանի հիանալի ելույթից հետո մրցումները եզրափակեցին գերծանր քաշային ծանրորդները:

ԵՐԵՎԱՆ, 8 ապրիլի — Sputnik, Խաչիկ Չախոյան. Գերծանր քաշայինների մրցումների ժամանակ Հայաստանը ներկայացնում էին օլիմպիական խաղերի արծաթե մեդալակիր Գոռ Մինասյանը և Ռուբեն Ալեքսանյանը: Ինչպես և Ռիոյում, պոկում վարժությունում պայքարը հիմնականում ընթացավ Գոռ Մինասյանը և Ռիոյի օլիմպիական խաղերի չեմպիոն Լաշա Տալախաձեի միջև:

Հայ մարզիկը գերազանցեց իր լավագույն արդյունքը այս վարժությունում՝ բարձրացնելով 211կգ կշռող ծանրաձողը: Բայց գերազանցել օլիմպիական չեմպիոնին չհաջողվեց: Տալախաձեն իր գլխավերևում պահեց 217 կիլոգրամ: Մեր մյուս ծանրորդը՝ Ռուբեն Ալեքսանյանը, երեք մոտեցումներից օգտագործեց միայն մեկը՝ գլխավերևում ֆիքսելով 190կիլոգրամանոց ծանրաձողը:

Հրում վարժությունը մեր մարզիկներից առաջինը սկսեց Գոռ Մինասյանը ու առաջին մոտեցումով իր անվան դիմաց գրանցեց 235կգ: Ռուբեն Ալեքսանյանն, իր հերթին, բարձրացրեց 240 կգ: Պարզ էր, որ Լաշա Տալախաձեյի հետ հավասար պայաքարել չի հաջողվի: Սակայն մեր ծանրորդները պայքարում էին երկամարտի մեդալների համար: Գոռ Մինասյանը, ի տարբերություն պոկում վարժության, հրումում ձախողեց վերջին երկու մոտեցումներն ու երկամարտի 446 կգ արդյունքով սպասեց մրցումների ավարտին:

Պոկում վարժությունում փայլեց Ռուբեն Ալեքսանյանը, որը կարողացավ երկամարտում մտնել մրցանակային եռյակ: Հայ ծանրորդը բարձրացրեց 244 կգ և ընդհանուր հաշվարկում ունեցավ 434 կգ արդյունք: Թվաց, թե Ռուբենը վնասվածք ստացավ երրորդ մոտեցման ժամանակ, բայց ամեն ինչ բարեհաջող ավարտվեց մեր մարզիկի համար: Այսպիսով, երկամարտում հայ ծանրորդները՝ Գոռ Մինասյանն ու Ռուբեն Ալեքսանյանը, երկամարտում վաստակեցին համապատասխանաբար արծաթե և բրոնզե մեդալներ: Բացի այդ, Գոռը երկրորդն էր պոկում վարժությունում, իսկ Ռուբենը երրորդը՝ հրումում: Իսկ Եվրոպայի չեմպիոն երկամարտի 467կգ (217+250) արդյունքով դարձավ Լաշա Տալախաձեն:

Սպլիտում Հայաստանի հավաքականը նվաճեց 11 մեդալ՝ 3 ոսկե, 3 արծաթե և 5 բրոնզե, ու թիմային հաշվարկում մեր ծանրամարտի ընտրանին զբաղեցրեց հինգերորդ տեղը:

45