ԵՐԵՎԱՆ, 19 մայիսի — Sputnik. Հայաստանի ազգային օլիմպիական կոմիտեի մամուլի ծառայության հետ զրույցում Հայաստանի լողի դաշնության գլխավոր քարտուղար Ռաֆայել Վասիլյանը հայտնել է, որ արդեն այսօր երկու հայ լողորդ օլիմպիական վարկանիշին իրականորեն հավակնելու արդյունքներ են ցույց տալիս:
«Չեմ ցանկանում առաջ անցնել, բայց այսօրվա արդյունքները հույս են ներշնչում, որ Բուենոս Այրեսում մենք երկու մարզիկ կունենանք»,- ասել է նա:
Պատանեկան օլիմպիական խաղերի ընտրական մրցաշար լինելու է այս տարվա օգոստոսին` Ինդիանապոլիսում կայանալիք պատանիների (մինչև 18 տարեկան) և աղջիկների (մինչև 17 տարեկան) աշխարհի առաջնությունը:
Վասիլյանի խոսքով՝ լողորդները եւս մեկ հնարավորություն կստանան ամառային պատանեկան եվրոպական օլիմպիական փառատոնում՝ հուլիսի 23-30-ը Հունգարիայի Դյոր քաղաքում: