Մարկոս Պիզելի

Մարկոս Պիզելին արդեն հայերեն գիտի. «Ամեն ինչ սկսվեց հայհոյանքներից»

142
(Թարմացված է 18:39 10.03.2017)
Հայաստանի հավաքականի կիսապաշտպանը չի ափսոսում Հայաստան գալու և ազգային հավաքականում հանդես գալու համար։ Կիսապաշտպանը Матч.tv–ին տված հարցազրույցում խոսել է իր տեղափոխության, երկրին հարմարվելու և Հենրիխ Մխիթարյանի մասին։

ԵՐԵՎԱՆ, 10 մարտի — Sputnik. Եղանակը, շփումը և ուտելիքը. ահա այն երեք բանը, որոնց դժվար է հարմարվել Հայաստանում, ասել է Հայաստանի ֆուտբոլի հավաքականի կիսապաշտպան Մարկոս Պիզելին ռուսական Матч.tv կայքին։

«Հայաստանում մշակույթն ուրիշ է, մարդիկ ուրիշ են, ամեն ինչն է ուրիշ։ Առաջին մի քանի օրերին քիչ էր մնում հետ գնայի, այնքան վատ էի։ Բոլորին ասում էի. «Գուցե Բրազիլիա՞ վերադառնամ»։ Բայց ես երիտասարդ էի և հասկանում էի, որ հնարավորություններս մեծ են, դա էր մնալուս գլխավոր պատճառը», — պատմել է նա։

Ֆուտբոլիստը հայկական անձնագիրը ստացել է Հայաստանում հանդես գալուց երկուսուկես տարի հետո (Պիզելին խաղացել է Երևանի «Արարատում»` խմբ.)։

«Այդ ժամանակ ՖԻՖԱ-ն թույլ էր տալիս, որ ֆուտբոլիստները քաղաքացիություն ստանան մինչև նոր երկրում գտնվելու հինգ տարին լրանալը։ Այնպես որ իմ բախտը բերեց։ Երկրորդ խաղաշրջանն առաջինից լավ ստացվեց, ես դարձա լիգայի լավագույն ռմբարկուն, և հաջորդ տարի Հայաստանի ֆուտբոլի ֆեդերացիայի նախագահ Ռուբեն Հայրապետյանն առաջարկեց ինձ դառնալ Հայաստանի քաղաքացի։ Ես իսկույն ասացի` «այո»», — ասել է ֆուտբոլիստը։

Նրա խոսքով` ընտանիքն ուրախ է եղել այդ որոշման համար. Բրազիլիայում հպարտանում են այն հայրենակիցներով, որոնք հաջողության են հասնում արտասահմանում։

«Հայերի արձագանքն ինձ նույնպես դուր եկավ», — ասել է Մարկոսը։

Նա պատմել է նաև, թե ինչպես է ուսումնասիրել հայոց լեզուն։ Ամեն ինչ սկսվել է հայհոյանքներից։

«Երբ նոր լեզու ես սովորում, հաճախ խոսում ես` չիմանալով խոսքն ինչի մասին է։ Խաղընկերներս կատակներ էին անում ինձ հետ. «Մարկոս, մարզչին ասա…, ու ինչ-որ բան էին ասում»։ Ես ասում էի, իսկ նրանք ծիծաղում էին։ Ես էլ` նրանց հետ։ Ի վերջո, ես սովորեցի բոլոր բառերը», — նշել է Պիզելին։

Բրազիլացին խոսել է նաև Հենրիխ Մխիթարյանի մասին` նշելով, որ նա իր կյանքը նվիրել է ֆուտբոլին։ «Ամեն օր աշխատում է` մտածելով վաղվա օրվա մասին և լրջորեն է վերաբերվում իր գործին»,- ասել է Պիզելին։

«Հենրիխը միշտ առողջ սնունդ է կերել, շուտ քնել, ալկոհոլ չի օգտագործել, չի արել այնպիսի մի բան, որը կարող էր վնասել առողջությունը։ Ոչ բոլորն են հետևում նման կարգուկանոնի, ինչպես Մխիթարյանը, և նա շատ ուժեղ բնավորություն ունի։ Երբ ես խաղում էի «Կուբանում», «Անժին» լուրջ առաջարկություն էր արել Հենրիխին գնելու մասին։ Բայց նա գրել էր ինձ. «Ոչ, Մարկոս, հարցը փողը չէ։ Ես երազում եմ խաղալ Եվրոպայի լավագույն ակումբներից մեկում», — պատմել է ֆուտբոլիստը։

Русская версия

142